قاسىم-جومارت توقايەۆ ەلەنا رىباكينامەن كەزدەستى

استانا. KAZINFORM - مەملەكەت باسشىسى قاسىم-جومارت توقايەۆ ەلەنا رىباكينانى ا ق ش اشىق چەمپيوناتىنداعى جارقىن جەڭىسىمەن جانە تەننيستەن «الەمنىڭ ءبىرىنشى راكەتكاسى» مارتەبەسىنە يە بولۋىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.

Photo credit: Akorda

پرەزيدەنت تاريحي ءمانى زور وسىناۋ تابىس وتاندىق سپورتتىڭ دامۋىنا ولشەۋسىز ۇلەس قوسقانىن اتاپ ءوتتى.

- ءسىزدىڭ جەڭىستەرىڭىزدەن كەيىن بالالاردىڭ تەننيسكە قىزىعۋشىلىعى ارتىپ، سەكسيالارعا كوپتەپ جازىلادى. ولار دا چەمپيون بولعىسى كەلەدى. جاس ورەندەرگە ونەگە كورسەتىپ وتىرسىز. بۇل - وتە وڭ ءۇردىس. وسكەلەڭ ۇرپاقتى سپورتقا باۋلۋ كەرەك، ويتكەنى بۇل ولاردىڭ كەلەشەگى ءۇشىن وتە ماڭىزدى. ءۇش بىردەي ۇلكەن دۋلىعا تۋرنيرىندەگى جەڭىسىڭىز تەننيس جىلناماسىنا وشپەستەي بولىپ جازىلدى. مۇنىمەن توقتاماي، الدا ءالى تالاي اسۋدى باعىندىراسىز دەپ سەنەمىن،- دەدى مەملەكەت باسشىسى.

پرەزيدەنت ەلەنا رىباكينانىڭ ادامي قاسيەتتەرىنە ايرىقشا توقتالدى.

Фото: Ақорда

- ءسىز كورتتا دا، جۇرتشىلىق ورتاسىندا دا بايىپتىلىعىڭىزدى بايقاتاسىز. ىشكى مادەنيەتىڭىز جوعارى ەكەنىن ۇنەمى ايتىپ جۇرەمىن. قازاقستاندى سپورتقا، اسىرەسە، تەننيسكە قولداۋ كورسەتەتىن وركەنيەتتى ءارى دامىعان مەملەكەت رەتىندە تانىتۋ تۇرعىسىنان مۇنىڭ ماڭىزى وتە زور،- دەدى قاسىم-جومارت توقايەۆ.

ەلەنا رىباكينا مەملەكەت باسشىسىنا ءوزىن ۇدايى قولداعانى، سونداي-اق قازاقستاندا ۇلكەن تەننيستىڭ دامۋىنا ايرىقشا قامقورلىق كورسەتكەنى ءۇشىن شىنايى ريزاشىلىعىن ءبىلدىردى. الەمنىڭ ءبىرىنشى راكەتكاسى قازاقستان اتىنان ونەر كورسەتۋدى ماقتان تۇتاتىنىن مالىمدەدى. تەننيسشى الداعى ۋاقىتتا دا جوعارى ناتيجەگە قول جەتكىزىپ، جانكۇيەرلەرىن جاڭا جەڭىستەرمەن قۋانتا بەرۋگە نيەتتى.

ايتا كەتەيىك، ەلەنا رىباكينا الەمنىڭ ءبىرىنشى راكەتكاسى اتانعانى تۋرالى جازدىق.