اتالعان ءتىزىمدى يوردانيادا ورنالاسقان كورولدىك يسلام ستراتەگيالىق زەرتتەۋلەر ورتالىعى (The Royal Islamic Strategic Studies Centre) جىل سايىن جاريالاپ وتىرادى.
باسىلىمدا قاسىم-جومارت توقايەۆ Political («ساياسات») ساناتىندا بەرىلگەن. سونىمەن قاتار ماقالادا 2022-جىلى باستالعان ساياسي وزگەرىستەرگە ەرەكشە نازار اۋدارىلعان. قاڭتار وقيعالارىنان كەيىن قاسىم-جومارت توقايەۆ «جاڭا قازاقستان» قۇرۋ باستاماسىن كوتەرىپ، اۋقىمدى ساياسي رەفورمالاردى ۇسىنعانى اتاپ وتىلگەن.
2022-جىلعى ماۋسىمدا وتكەن رەسپۋبليكالىق رەفەرەندۋمدا كونستيتۋتسياعا ەنگىزىلگەن وزگەرىستەر ماقۇلداندى. بۇل تۇزەتۋلەر پرەزيدەنتتىڭ وكىلەتىن شەكتەۋدى، پارلامەنتتىڭ ءرولىن كۇشەيتۋدى جانە پرەزيدەنتتىڭ جاقىن تۋىستارىنىڭ مەملەكەتتىك قىزمەتتە جوعارى لاۋازىمدارعا يە بولۋىنا تىيىم سالۋدى كوزدەدى.
سونداي-اق باسىلىم اۆتورلارى 2022-جىلعى قاراشادا وتكەن كەزەكتەن تىس پرەزيدەنت سايلاۋىندا قاسىم-جومارت توقايەۆتىڭ 81,31 پايىز داۋىس جيناپ، جەڭىسكە جەتكەنىن ەسكە سالعان. جاڭا كونستيتۋتسياعا سايكەس، ءول بىر رەت قانا جەتى جىلدىق مەرزىمگە سايلاندى.
The Muslim 500 - الەمنىڭ ءتۇرلى ەلدەرىندەگى مۇسىلمان قاۋىمىنا ەلەۋلى ىقپال ەتىپ جۇرگەن تۇلعالار تۋرالى جىل سايىن شىعاتىن باسىلىم.
ءتىزىمدى جاساۋ كەزىندە قوعامدىق پىكىر، ساراپشىلاردىڭ باعاسى، الەۋمەتتىك كورسەتكىشتەر مەن ۇمىتكەرلەردىڭ ءومىر بويى جەتكەن جەتىستىكتەرى ەسكەرىلەدى. تۇلعالاردىڭ ىقپالى تەك ساندىق كورسەتكىشتەرمەن عانا ەمەس، مۇسىلمان قاۋىمىنا تيگىزگەن ۇزاق مەرزىمدى اسەرىمەن دە باعالانادى.
باسىلىمعا بارلىعى 500 ادام ەنگىزىلگەن. العاشقى 50 قاتىسۋشى رەيتينگتە ناقتى ورىندارعا يە بولسا، قالعان 450 ادام ساياسات، ءدىن، بيزنەس، عىلىم، مادەنيەت، قايىرىمدىلىق، سپورت جانە باسقا دا سالالاردى قامتيتىن 13 ساناتقا بولىنگەن.
The Muslim 500 تاريحىندا العاش رەت 2027-جىلعى شىعارىلىمدا ءبىرىنشى ورىندى بەس تۇلعا ءبولىستى. اتاپ ايتقاندا، ساۋد ارابياسىنىڭ كورولى سالمان بين ابدۋلازيز ءال ساۋد، تاق مۇراگەرى ءارى پرەمەر-مينيستر مۇحاممەد بين سالمان ءال ساۋد، پاكىستان پرەمەر-ءمينيسترى ميان مۇحاممەد شاحباز شاريف، پاكىستان قورعانىس كۇشتەرىنىڭ باسشىسى ءارى ارميا شتابىنىڭ باستىعى، فەلدمارشال اسيم مۋنير جانە تۇركيا پرەزيدەنتى رەجەپ تايپ ەردوعان.
باسىلىم اۆتورلارى مۇنداي شەشىمگە اتالعان ساياسي كوشباسشىلاردىڭ ساۋد ارابياسى، پاكىستان جانە تۇركيا اراسىنداعى قاۋىپسىزدىك سالاسىنداعى ىنتىماقتاستىقتى دامىتۋعا قوسقان ۇلەسى سەبەپ بولعانىن تۇسىندىرگەن.
ايتا كەتەيىك، بيىل اقپاندا قاسىم-جومارت توقايەۆ مۇسىلمان اقساقالدار كەڭەسىنىڭ جانە شەيح زايد اتىنداعى «ادامزات باۋىرلاستىعى» سىيلىعىنىڭ باس حاتشىسى مۇحاممەد ابدەلسالاممەن كەزدەسكەن ەدى.
ەسكە سالايىق، بۇعان دەيىن مەملەكەت باسشىسى حالىقارالىق ارەنادا بەدەلدى ءارى ىرگەلى ينستيتۋتتاردىڭ ءبىرى سانالاتىن مۇسىلمان اقساقالدار كەڭەسىنىڭ ەلىمىزدە جۇزەگە اسىرىپ جاتقان ماڭىزدى جوبالارى مەن باستامالارىنا قولداۋ بىلدىرگەن ەدى.