شىمەنباي ءالشورين وتكەن عاسىردىڭ وتىزىنشى جىلدارى زاڭ ورىندارىندا قىزمەت ەتكەن، جازىقسىز قۋعىن-سۇرگىنگە ۇشىراپ، ەكى رەت تۇرمەگە جابىلعان. اباقتىدان بوساپ كەلگەن سوڭ، سوعىستان كەيىنگى شارۋاشىلىقتى قالپىنا كەلتىرۋ جۇمىسىنا بەلسەنە اتسالىسىپ، ەڭبەكپەن داڭقى شىعادى. 1932-جىلعى اشتىقتا تورعاي ءوڭىرىن ارالاعان بەيىمبەت مايلين، عابيت مۇسىرەپوۆتەردىڭ قاسىندا جۇرگەن. ءومىردىڭ اشى- تۇشىسىن كوپ تاتقان قاريانىڭ تۇرمەدە جاتىپ شىعارعان ولەڭدەرى، اڭگىمەلەرى، ءوز جانىنان ماقال-ماتەلدەرى دە ساقتالعان. ونى بەلگىلى ولكەتانۋشى ءشوپتىباي ءبايدىلدين زەرتتەپ، جيناقتاپ، «مۇحيتتان وتكەن قايىق» دەگەن اتپەن جەكە كىتاپ ەتىپ باستىرىپ شىعاردى.
اتى اڭىزعا اينالعان ادامنىڭ كونە ىشىگىن مۇراجايعا ۇرپاقتارى اكەلىپ تاپسىرعان. مۋزەي ماماندارىنىڭ ايتۋىنشا، ىشىكتىڭ بۇل ءتۇرى ايازدى بوراندا دا سۋىق وتكىزبەيدى. قاسقىر ىشىك بەل، بۋىن اۋرۋلارىنا (مىسالى، راديكۋليت، ريەۆماتيزم) شيپا بولادى دەپ ەسەپتەلگەن. ونى دەنەگە 1-2 ساعات جامىلىپ وتىرسا، دەنە بويىنا قۋات تاراپ، جىلىپ سالا بەرەدى. الايدا قازاق اراسىندا قاسقىر ىشىككە قاتىستى ءداستۇرلى ىرىم-تىيىمدار بار.
«مىسالى، بۇل ىشىكتى جاسى قىرىقتان اسقان ادامدار عانا كيەتىن بولعان. قىزۋى كۇشتى بولعاندىقتان، بەلسىزدىككە ۇشىراتادى نەمەسە وكپەگە زيان كەلتىرەدى دەپ جاس جىگىتتەرگە كيگىزبەگەن. سونداي-اق قىستىگۇنى الىس ساپارعا شىققان ەكى جولاۋشىنىڭ ءبىرى ءۇسىپ كەتسە، ال قاسىنداعى سەرىگى قاسقىر ىشىك كيگەن بولسا، سول ادام قۇن تولەيتىن بولعان. سەبەبى قاسقىر ىشىك ەكى-ءۇش ادامدى قاۋسىرۋعا جەتەتىن مولىنان پىشىلگەن دۇنيە عوي. ونى كيگەن ادام قاسىنداعى ادامنىڭ ومىرىنە جاۋاپتى بولعان»، دەيدى مۋزەي باسشىسىنىڭ ورىنباسارى باتىرلان ساعىنتاي.
egemen.kz
قوستاناي وبلىسى
نۇرقانات قۇلابايەۆ