قارىزى كەشىرىلگەن ازاماتتارعا سالىق سالىنبايدى: جاڭا تۇزەتۋ ماقۇلداندى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكىزىلگەن سالىق كودەكسىن ەنگىزۋ جونىندەگى جوبالىق كەڭسەنىڭ 30-وتىرىسىندا سالىق كودەكسىنە ەنگىزىلەتىن ەكى تۇزەتۋ ماقۇلداندى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.

Фото: Үкімет

ءبىرىنشى تۇزەتۋدە كرەديتتەر مەن ميكروكرەديتتەر بويىنشا پروبلەمالىق بەرەشەكتى ەسەپتەن شىعارۋ كەزىندە جەكە تۇلعالاردى جەكە تابىس سالىعىنان (ج ت س) بوساتۋ كوزدەلگەن.

بۇل ماسەلە جوبالىق كەڭسەنىڭ وتىرىستارىندا بىرنەشە رەت جان-جاقتى قارالىپ، ونى شەشۋدىڭ ءتۇرلى جولى، قارىز الۋشىلار مەن نەسيە ۇيىمدارىنا سالدارى تالقىلانعان بولاتىن. تالقىلاۋ قورىتىندىسى بويىنشا قاتىسۋشىلار زاڭنامادا قارىز الۋشى ءوز مىندەتتەمەسىن ورىنداي المايتىن بارلىق ومىرلىك جاعدايلاردى قاراستىرۋ ءىس جۇزىندە مۇمكىن ەمەس دەگەن قورىتىندىعا كەلدى. وسىعان بايلانىستى ءبىرىڭعاي ءتاسىلدى بەلگىلەۋ: قارىز الۋشىلارعا قوسىمشا تالاپتارسىز، ءبىراق بەلگىلەنگەن ليميتتەر شەگىندە پروبلەمالىق بەرەشەكتى كەشىرۋ كەزىندە جەكە تۇلعالاردى ج ت س-تان بوساتۋ ۇسىنىلدى.

Фото: Үкімет

قازىر بانكتەر پروبلەمالىق بەرەشەكتى جىلىنا نەسيە پورتفەلىنىڭ 10 پايىز شەگىندە، ال ميكروقارجى ۇيىمدارى 20 پايىز شەگىندە پروۆيزيالاردى تومەندەتۋدەن تۇسكەن تابىستى مويىنداماي كەشىرە الادى. ليميتتەردى تيىسىنشە 5 پايىز جانە 10 پايىزعا دەيىن ەكى ەسە تومەندەتۋ جانە وسى شەكتەردە باسقا تالاپتاردى بەلگىلەمەي، قارىزداردى ەسەپتەن شىعارۋ كەزىندە جەكە تۇلعالاردى ج ت س-دان بوساتۋ ۇسىنىلادى. ەگەر ليميت اسىپ كەتسە، كرەديتور ارتىق سوماعا پروۆيزيالاردى تومەندەتۋدەن تۇسكەن تابىستى تانيدى جانە ودان سالىق اگەنتى رەتىندە ج ت س تولەيدى.

ماقۇلدانعان تۇزەتۋ سالىق كودەكسىنە ەنگىزىلگەن جالپى وزگەرىستەر پاكەتىنە كىرەدى. ەكىنشىسى سالانى دامىتۋدىڭ 2026- 2030 -جىلدارعا ارنالعان كەشەندى جوسپارىندا كوزدەلگەن جەڭىل ونەركاسىپتى سالىقتىق ىنتالاندىرۋ شارالارىنا قاتىستى.

Фото: Үкімет

قولداۋ قۇرالىنىڭ ءبىرى ءوندىرىستى لوكاليزاتسيالاۋدى ارتتىرۋ تۋرالى كەلىسىم. بۇل تەتىك ارقىلى كاسىپورىننىڭ ونەركاسىپ جانە قۇرىلىس مينيسترلىگىمەن كەلىسىمىنىڭ نەگىزىندە سالىقتىق پرەفەرەنتسيالار بەرىلەتىن ارنايى ينۆەستيتسيالىق كەلىسىمشارت جاساسۋى كوزدەلەدى. وسى تەتىكتى جۇزەگە اسىرۋ ءۇشىن جەر سالىعى، مۇلىك سالىعى، جەر ۋچاسكەلەرىن پايدالانعانى ءۇشىن تولەماقى جانە جەرگىلىكتەندىرۋدى ارتتىرۋ تۋرالى كەلىسىم جاساسقان ۇيىمدار ءۇشىن سالىق كودەكسىنە كورپوراتيۆتىك تابىس سالىعى بويىنشا جەڭىلدىك بەرۋ قاراستىرىلاتىن وزگەرىس ەنگىزۋ قاجەت.

كاسىپورىننىڭ كىناسىنەن كەلىسىم بۇزىلعان جاعدايدا، زاڭدى بۇزۋعا جول بەرىلگەن سالىق كەزەڭىنىڭ باسىنان باستاپ سالىقتىق پرەفەرەنتسيالار جويىلادى. بۇل ۇسىنىستى سالالىق زاڭناماعا قاجەتتى تۇزەتۋ جاساۋ ارقىلى سالىق كودەكسىندەگى وزگەرىستەر پاكەتىنە ەنگىزۋ ماقۇلداندى. تالقىلاۋ بارىسىندا جەڭىل ونەركاسىپ كاسىپورىندارى قاۋىمداستىعىنىڭ وكىلى سالتانات ابدىكارىموۆا دايىن ءونىمدى ءوندىرۋ ءۇشىن پايدالانىلاتىن ماتالاردى يمپورتتاۋ كەزىندە ق ق س تولەۋ ماسەلەسىن كوتەردى. ونىڭ ايتۋىنشا، بۇگىندە كاسىپورىندار شيكىزاتتى اكەلۋ كەزىندە ق ق س-تى تولىق تولەۋگە ءماجبۇر بولسا، ال تاپسىرىس بەرۋشىنىڭ دايىن ءونىمدى تولەۋى بىرنەشە ايعا، كەيدە توعىز ايعا دەيىن سوزىلۋى مۇمكىن. بۇل ءوندىرۋشىنىڭ اينالىم قاراجاتىنا قوسىمشا جۇكتەمە.

مۇنىڭ ءبىر شەشىمى رەتىندە مەملەكەتتىك كىرىستەر كوميتەتى شيكىزات رەتىندە پايدالانىلاتىن ماتالاردى يمپورتتاۋ كەزىندە ق ق س تولەۋدى ءبولىپ تولەۋدىڭ قولدانىستاعى تەتىگىن قازاقستان اۋماعىندا ءونىم وندىرۋدە پايدالانۋدى ۇسىندى.