قارىزدان قالاي قۇتىلۋعا بولادى؟ مامان ونىڭ ەكى جولىن ۇسىندى

استانا. قازاقپارات - قارجى مامانى اسەل جاراسقالي قىزى «مامسكي اڭگىمە» پودكاستىندا قارجىلىق ساۋاتتىلىقتىڭ نەگىزدەرىن جانە قارىزدان قۇتىلۋ جولدارىن اتادى.

قارجىلىق ساۋاتتىلىق دەگەنىمىز نە؟

مامان قارجىلىق ساۋاتتى بولۋ ءۇشىن قانشا اقشا تاباتىنىڭىز ماڭىزدى ەمەس ەكەنىن ايتتى.

«قارجىلىق ساۋاتتىلىق - ادەت جانە ءبىلىم. ۆەلوسيپەد تەبۋ، اعىلشىن ءتىلىن ءبىلۋ سەكىلدى كەز كەلگەن ازاماتتىڭ قارجىلىق ساۋاتتىلىعى بولۋى كەرەك. قارجىلىق ساۋاتتىلىق - كەز كەلگەن ازاماتتىڭ بۇگىنگى اقشاعا قاتىستى قابىلداعان شەشىمدەرى. ەڭ ماڭىزدىسى - قانشا اقشا تابۋ ەمەس. ءبىز قانشا اقشا تابامىز، سونشا اقشا جۇمسايمىز. قارجىلىق ساۋاتتىلىق دەگەنىمىز - ول ءوزىمىزدىڭ ءومىرىمىزدى ماقساتتى تۇردە جوسپارلاي وتىرىپ، كەز كەلگەن نارسەگە، ارمان-ماقساتقا نەسيەسىز نەمەسە اقىلدى نەسيەنى دۇرىس قولدانا وتىرىپ، ۋاقىتىلى جەتۋ»، - دەيدى قارجىگەر.

نەلىكتەن ادامدار نەسيە الا بەرەدى؟
اسەل جاراسقالي قىزى كوپشىلىك ادام ەموتسياعا بەرىلىپ، نەسيە الىپ قويا بەرەتىنىن ايتتى.

«قازاقتىڭ باستى جاۋى - ەموتسياعا ەرىك بەرۋ مەن ءتارتىپتىڭ جوقتىعى. بىزدە ادامدار - ماركەتينگتىڭ قۇلى. كوپشىلىك ەموتسيالىق ساۋدا جاسايدى. قارجىلىق جوسپاردىڭ جوقتىعىنان قارجىلىق ءتارتىپ بولمايدى. قارجىلىق ساۋات تارتىپتەن، ەموتسيانى باسقارۋدان، ناقتى ماقساتتان، قارجىلىق جوسپاردان، قارجىلىق قاۋىپسىزدىك جاستىعىنان تۇرادى. كەز كەلگەن ازامات سونىڭ بارلىعىن رەتتەي وتىرىپ قانا ۇلكەن مۇمكىندىكتەرگە جەتە الادى. ءبىراق ءبىز ەموتسياعا بەرىلەمىز، قارىزدىڭ، نەسيەنىڭ قۇلى بولامىز»، - دەيدى ول.

قارىزدان قالاي قۇتىلۋعا بولادى؟
ماماننىڭ ايتۋىنشا، بۇگىنگى تاڭدا تۇتىنۋشى نەسيەنىڭ سوماسى تريلليوننان اسىپ كەتكەن ەكەن. اسەل جاراسقالي قىزى قارىزدان قۇتىلۋدىڭ ەكى جولىن ۇسىندى.

ءبىرىنشىسى - قارىزدان پسيحولوگيالىق تۇرعىدا قۇتىلۋ
مىسالى، باسىڭىزدا 6-7 نەسيە بولسا، سونىڭ نەگىزگى بورىشىن قاراي وتىرىپ، سوماسى ەڭ ازداردان قۇتىلىڭىز. مىسالى، 100 مىڭ نەمەسە 200 مىڭ قالعان بولسا، سولاردان باستاڭىز. وسىلايشا، 7-، 6-، 5- نەسيەنى جابۋ. نەسيەلەردى ساتىلى تۇردە جابا وتىرىپ، وزىڭىزگە «مەن نەسيەنى جابا الامىن»، «مەن نەسيەدەن قۇتىلا الامىن» دەگەن پسيحولوگيالىق تۇرعىدا ءوز-ءوزىڭىزدى جەڭە الاسىز جانە كۇرەسە الاسىز. بۇدان كىشكەنتاي جەڭىستەر ۇلكەن ناتيجەگە اكەلەتىنىن تۇسىنەسىز. ءوزىڭىزدى جانە باسقانى سەندىرەسىز.

ەكىنشىسى - قارىزدان قارجىلىق تۇرعىدا قۇتىلۋ
بۇل ءادىس بويىنشا، ەڭ قىمبات نەسيەدەن باستاپ جابۋ قاجەت. مىسالى، باسىڭىزدا 5-6 نەسيە بولسا، ونىڭ جارتىسى ءبولىپ تولەۋمەن الىنعان بولۋى مۇمكىن. ال ەڭ قىمبات نەسيەلەرگە تۇتىنۋشى نەسيەسى كىرەدى. وسى تۇتىنۋشى نەسيەنى دۇرىس جابا ءبىلۋ ماڭىزدى، ول ءۇشىن ناقتى قارجىلىق جوسپار قۇرۋ كەرەك. جارتىلاي الدىن الا جابا وتىرىپ، قىمبات قارىزداردان قۇتىلۋعا بولادى.