قارىز ءھام ارىز: استانا اۋرۋحانالارىنىڭ ماسەلەسى شاش-ەتەكتەن

استانا. KAZINFORM - بۇگىندە ەلورداعى مەديتسينالىق ۇيىمداردىڭ كرەديتورلىق بەرەشەگى ارتپاسا، كەمىگەن ەمەس. كوممۋنالدىق قىزمەتتەن باستاپ ءدارى جەتكىزۋشىلەرگە دەيىن قارىز. بۇعان دارىگەرلەردىڭ قىزمەتىنە كوڭىلى تولمايتىن ەمدەلۋشىلەردىڭ ارىز-شاعىمىن قوسىڭىز. سالدارىنان اۋرۋحانا باسشىلارى وزدەرى دە ەم ىزدەيتىن كۇنگە جەتكەن. بۇل پروبلەما بۇگىن استانا قالاسىنىڭ قوعامدىق كەڭەسى ۇيىمداستىرعان قوعامدىق تىڭداۋ بارىسىندا كوتەرىلدى. تۇرعىنداردىڭ كوڭىلى تولمايتىن م ءا م س ماسەلەسى دە ءسوز بولدى.

استانا قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆانىڭ ايتۋىنشا، ءمامس ارقىلى قارجىلاندىرىلاتىن باسقارماعا قاراستى مەديتسينالىق ۇيىمداردىڭ بيۋدجەتى بيىل 120,4 ميلليارد تەڭگەنى قۇراعان. بۇل - وتكەن جىلمەن سالىستىرعاندا %2,5 پايىزعا ارتىق. دەسە دە، مەديتسينالىق ۇيىمداردىڭ كرەديتورلىق بەرەشەگى ازايماي تۇر.

«مەديتسينالىق ۇيىمداردى قارجىلاندىرۋدىڭ جەتكىلىكسىزدىگىنەن كرەديتورلىق بەرەشەك قالىپتاستى. بۇگىندە ولاردىڭ كرەديتورلىق بەرەشەك سوماسى 14,7 ميلليارد تەڭگەنى قۇرايدى. ونىڭ ىشىندە «س ك-فارماتسيا» ج ش س-عا 4,5 ميلليارد، وزگە دە جەتكىزۋشىلەرگە 10,2 ميلليارد تەڭگە بەرەشەك بار. 2022-2023 -جىلدارى مەرزىمى وتكەن كرەديتورلىق بەرەشەك سوماسى 3,3 ميلليارد تەڭگەگە تەڭ. اتاپ ايتساق، №1-كوپسالالى قالالىق اۋرۋحانانىڭ بەرەشەگى - 2,2 ميلليارد تەڭگەگە، قالالىق فتيزيوپۋلمونولوگيا ورتالىعىنىڭ قارىزى - 662 ميلليون تەڭگەگە جانە قالالىق ينفەكتسيالىق ورتالىعىنىڭ بەرەشەگى 398 ميلليون تەڭگەگە جەتتى»، - دەدى ءاليا رۇستەموۆا.

ونىڭ ايتۋىنشا، كرەديتورلىق بەرەشەكتىڭ پايدا بولۋىنىڭ نەگىزگى سەبەپتەرى تومەندەگىدەي:

- ءدارى- دارمەكتەر مەن مەديتسينالىق بۇيىمدارعا، ازىق-تۇلىككە، كوممۋنالدىق جانە باسقا دا قىزمەتتەرگە باعانىڭ جىل سايىنعى ءوسۋىن كوزدەمەيتىن تومەن تاريفتەر؛

- مەديتسينا قىزمەتكەرلەرىنىڭ جالاقىسىن ارتتىرۋ؛

- كورسەتىلەتىن قىزمەتتەر كولەمىنە كەلىسىلگەننەن تومەن شارتتار جاساسۋ.

بۇدان بولەك، اعىمداعى كرەديتورلىق بەرەشەكتىڭ پايدا بولۋ سەبەبى مەديتسينالىق ساقتاندىرۋ قورىنىڭ فيليالى تاراپىنان ۋاقتىلى قارجىلاندىرىلماۋىنان تۋىنداعان ەكەن. ماسەلەن، بۇگىندە مەديتسينالىق ۇيىمدارعا اعىمداعى جىلدىڭ 4 ايىندا عانا ورىندالعان جۇمىستار اكتىلەرى بويىنشا قاراجات تولەنىپتى.

قۇزىرلى ورگاندار №1-قالالىق كوپبەيىندى اۋرۋحانانىڭ كرەديتورلىق بەرەشەگىن جەرگىلىكتى بيۋدجەت قاراجاتى ەسەبىنەن وتەۋ تەتىكتەرىن قاراستىرۋدا. بۇل ماسەلە بيىل 2-قىركۇيەكتە ءماسليحات وتىرىسىندا كوتەرىلمەك.

اۆتور
ورالحان قوجانوۆ