اۋستراليا عالىمدارى ۇلى بريتانيانىڭ 78 مىڭنان استام تۇرعىنىنىڭ دەرەكتەرىن تالداعان. ناتيجەسىندە كۇنىنە شامامەن 3800 قادام جۇرەتىن ادامداردا دەمەنسيانىڭ دامۋ قاۋپى از قوزعالاتىن ادامدارمەن سالىستىرعاندا 25 پايىزعا تومەن بولعانى انىقتالدى. بۇل رەتتە ءجۇرۋ جىلدامدىعى شەشۋشى ءرول اتقارماعان.
الدىن الۋ اسەرى كۇنىنە شامامەن 9800 قادام جۇرگەن ادامدار اراسىندا جوعارى بولعان. كۇن سايىن 10 مىڭ قادامداي جۇرەتىن قاتىسۋشىلارعا 7 جىلدىق باقىلاۋ كەزەڭىندە دەمەنسيا دياگنوزى قويىلۋ ىقتيمالدىعى شامامەن ەكى ەسە تومەن بولعان.
فينليانديادا جۇرگىزىلگەن FINGER زەرتتەۋى دە ءومىر سالتىن وزگەرتۋ ميدىڭ ساۋلىعىن ساقتاۋعا جانە تانىمدىق قابىلەتتەردىڭ ناشارلاۋ قاۋپىن ازايتۋعا كومەكتەسەتىنىن كورسەتتى. زەرتتەۋگە نەيروگەرياتريا پروفەسسورى ميا كيۆيپەلتو جەتەكشىلىك ەتكەن.
زەرتتەۋ بارىسىندا ماماندار دەنە بەلسەندىلىگى، دۇرىس تاماقتانۋ جانە تانىمدىق جاتتىعۋلاردى قامتيتىن شارالار كەشەنىنىڭ اسەرىن باعالاعان. ناتيجەلەر سالاۋاتتى ءومىر سالتىنىڭ بىرنەشە فاكتورىن قاتار ۇستانۋ تانىمدىق قابىلەتتەرگە اناعۇرلىم وڭ ىقپال ەتەتىنىن كورسەتتى.
پروفەسسوردىڭ ايتۋىنشا، ميداعى پاتولوگيالىق وزگەرىستەر العاشقى بەلگىلەر بايقالعانعا دەيىن 15- 20 جىل بۇرىن باستالۋى مۇمكىن. سوندىقتان دەمەنسيانىڭ الدىن الۋ ەگدە جاستا دا، جاس كەزدە دە ماڭىزدى.
ەل تۇرعىندارىنىڭ شامامەن ۇشتەن ءبىرى السگەيمەر اۋرۋىنىڭ دامۋ قاۋپىن ارتتىراتىن APOE4 گەنىنىڭ نۇسقاسىن تاسىمالدايدى. الايدا گەنەتيكالىق بەيىمدىلىكتىڭ بولۋى ادامنىڭ مىندەتتى تۇردە وسى اۋرۋعا شالدىعاتىنىن بىلدىرمەيدى.
ماماننىڭ سوزىنشە، مي ساۋلىعىنا قامقورلىق جاساۋ ەشقاشان ەرتە دە، كەش تە ەمەس.
ەسكە سالايىق، عالىمدار فيزيكالىق بەلسەندىلىك پەن دەمەنتسيا اراسىنداعى بايلانىستى انىقتادى.
وسىعان دەيىن امازونكا تۇرعىندارىنان دەمەنسيادان قورعايتىن «يممۋنيتەت» تابىلدى.