جۇماعىز بيماعانبەتوۆا بلوگ جۇرگىزۋدى بيىل قىركۇيەكتە باستاعان. بۇعان دەيىن دە الەۋمەتتىك جەلىگە كۇندەلىكتى ءومىرىن ءتۇسىرىپ جۇرگەن ول ماماندارمەن بايلانىسىپ، بەلسەندى ءومىر سالتىن ناسيحاتتايتىن جەكە بلوگىن دامىتۋعا كىرىسكەن.
- 8-قىركۇيەكتەن باستاپ بلوگ جۇرگىزە باستادىم. ال 28-شىلدەدەن باستاپ كۇندەلىكتى جۇرە باستادىم. ماماندار حابارلاسىپ، قالاي جۇرەتىنىمدى، نە ىستەيتىنىمدى، كۇندەلىكتى ءومىرىمدى كورسەتسەم دەگەن ۇسىنىس ايتتى. جاستارعا، اياعى، جۇرەگى اۋىراتىن ادامدارعا كۇندەلىكتى قوزعالىستىڭ قانداي ناتيجە بەرەتىنىن ايتقىم كەلدى. سودان بەرى ءوزىم ءجۇرىپ، جاتتىعۋ جاساپ، ءبارىن الەۋمەتتىك جەلىگە سالىپ وتىرمىن، - دەيدى ول.
ونىڭ ادەتتەگى كۇنى تاڭعى بەستەن باستالادى. التى جارىم، جەتىگە دەيىن 10 مىڭ قادام جۇرۋگە تىرىسادى. تەلەفونىنداعى قادام ساناعىش ارقىلى ءجۇرىسىن باقىلاپ وتىرادى. ۇيگە قايتار جولدا جاتتىعۋ جاساپ، كەيىن نەمەرەسىن مەكتەپكە شىعارىپ سالادى. ونىڭ ايتۋىنشا، تاڭعى قوزعالىس كۇن بويىنداعى سەرگەكتىگىنە اسەر ەتەدى.
- تاڭەرتەڭ جۇرگەنىمنىڭ ارقاسىندا كەشكە دەيىن كۇش-قۋات بولادى. تاڭەرتەڭ اۋا دا باسقاشا، ميىڭ دا دەمالادى. بۇرىن ەكى اياعىم كەشكە قاراي سىرقىراپ اۋىراتىن. قازىر ءتورتىنشى قاباتتا تۇرامىن، ءتورتىنشى قاباتقا جۇگىرىپ شىعىپ ءجۇرمىن. ۇيگە تەرلەپ كەلەمىن. كەيدە بەلتەمىردە (تۋرنيك) دە اسىلامىن، - دەيدى بلوگەر اجە.
جۇماعىز بيماعانبەتوۆا ءۇشىن الەۋمەتتىك جەلىگە كونتەنت جاساۋ دا كۇندەلىكتى ادەتكە اينالعان. ۆيدەونى ءتۇسىرۋ، وڭدەۋ جانە جاريالاۋ جۇمىستارىن ءوزى اتقارادى. بۇل ىسكە ارنايى كۋرس وقىپ، قاجەتتى داعدىلاردى ءوز بەتىمەن مەڭگەرگەن.
- ۆيدەونى وڭدەۋ، ونى سالۋ - ءبارىن ءوزىم جاسايمىن. بالالارىم ءتىپتى بلوگ جۇرگىزەتىنىمدى بىلمەيدى. ءوزىم كۋرس الىپ، ءوزىم ۇيرەندىم. قالاي ىستەيمىن، سولاي سالامىن، - دەيدى ول.
بەلسەندى ءومىر سالتى كەيىپكەردىڭ ومىرىندەگى العاشقى باستاما ەمەس. جۇماعىز بيماعانبەتوۆا جاستىق شاعىندا اۋىلدا كومسومول حاتشىسى بولعان. كەيىن مۇناي بازاسىندا مەڭگەرۋشى قىزمەتىن اتقارىپ، اۋىل شارۋاشىلىعى سالاسىندا دا ەڭبەك ەتكەن. بالالارىن قالادا وقىتىپ، كەيىن نەمەرەلەرىن تاربيەلەۋگە كوڭىل بولگەن.
قازىر ۇلكەن نەمەرەسى 17 جاستا، ال كەنجە نەمەرەسى ەكى ايلىق. جالپى بلوگەر اجە 16 جىلدان بەرى نەمەرە تاربيەلەپ كەلەدى.
- بالالارىمدى قالادا وقىتتىم. 48 جاسىمدا نەمەرە باعىپ قالدىم. قازىر 16 جىل بولدى نەمەرە باعىپ وتىرعانىما. سودان كەيىن ءوز ومىرىمدە ىستەلمەي قالعان دۇنيەلەر بار سياقتى سەزىندىم. سونى ءوزىم قولعا الىپ جاتىرمىن، - دەيدى جۇماعىز بيماعانبەتوۆا.
ول سوڭعى ۋاقىتتا تاماقتانۋىنا دا كوڭىل بولە باستاعانىن ايتادى. ءبىر اي ىشىندە 10 كەلى سالماق تاستاعان.
- ءبىر ايدا 10 كەلى تاستادىم. ونىڭ ەشقانداي قۇپياسى جوق. بىرىنشىدەن، 10 مىڭ قادام جۇرەمىن. بۇرىن اق نان مەن قايماقتى ءۇش مەزگىل جەيتىنمىن. ناندى وتە جاقسى كورەمىن. قازىر اق ناندى الىپ تاستادىم، قارا نان جەيمىن. تاتتىلەردى دە قويدىم. قانتقا بايلانىستى جەۋگە بولمايتىن تاعامداردىڭ ءبارىن الىپ تاستادىم، - دەيدى ول.
كەيىپكەردىڭ ايتۋىنشا، ونىڭ 2- ءتيپتى قانت ديابەتى بار. قازىر دەنساۋلىعىنا ەرەكشە ءمان بەرىپ، فيزيكالىق بەلسەندىلىگىن ارتتىرعان. ينسۋلين قولدانۋدى توقتاتقانىن دا ايتادى. الايدا مۇنداي جاعدايدا ءدارى-دارمەك مولشەرىن نەمەسە ەمدەۋ ءتاسىلىن دارىگەردىڭ كەڭەسىنسىز وزگەرتۋگە بولمايدى.
جۇماعىز بيماعانبەتوۆا بلوگ جۇرگىزۋدى دەنساۋلىعىن كۇتۋگە عانا ەمەس، الداعى جوسپارلارىنا دا بايلانىستىرادى. ول شەتەلگە ساياحاتتاپ، نەمەرەلەرىنە كومەكتەسەتىن جاعدايعا جەتۋدى ارماندايدى. جۇماعىز بيماعانبەتوۆا ءۇشىن زەينەت جاسى بۇرىن كەيىنگە قالدىرىلعان ىستەرگە قايتا ورالاتىن كەزەڭگە اينالعان.