پرەزيدەنت Qarmet كومپانياسىنىڭ بۇعان دەيىنگى جاي-كۇيى كۇردەلى بولعانىنا نازار اۋداردى.
- قابىلدانعان باتىل شەشىمدەر جاعدايدى وزگەرتىپ، وسى بىرەگەي كومبيناتتىڭ دامۋىنا تىڭ سەرپىن بەردى. شىعىستاردى وڭتايلاندىرۋ جانە ينۆەستيتسيا تارتۋ ارقىلى كومپانيا ميللياردتاعان شىعىننان ارىلىپ، قيىن كەزەڭدى ەڭسەردى. وسىنىڭ ناتيجەسىندە بىلتىر Qarmet 1,1 تريلليون تەڭگە تۇسىممەن تازا پايداعا شىقتى. كاسىپورىندا اۋقىمدى جاڭعىرتۋ باعدارلاماسى قولعا الىندى. ونى ىسكە اسىرۋعا 2028 -جىلعا دەيىن 3,5 ميلليارد دوللار قارجى جۇمسالادى. وندىرىسكە وزىق تەحنولوگيالار مەن سيفرلىق شەشىمدەر ەنگىزۋگە ايرىقشا ءمان بەرىلۋدە. جۇمىستى ۇيىمداستىرۋ جانە ەڭبەك قاۋىپسىزدىگى ماسەلەسى ەرەكشە باقىلاۋعا الىندى، - دەدى مەملەكەت باسشىسى.
قاسىم-جومارت توقايەۆتىڭ ايتۋىنشا، بۇگىندە Qarmet بيزنەستىڭ جوعارى دەڭگەيدەگى الەۋمەتتىك جاۋاپكەرشىلىگى قانداي بولاتىنىن كورسەتىپ وتىر.
- ماسەلەن، كاسىپورىن ءوز ەسەبىنەن تەمىرتاۋداعى ترامۆاي قوزعالىسىن تولىق قالپىنا كەلتىردى. مەن الگىندە عانا ترامۆايمەن ءجۇرىپ كورىپ، اتالعان باستامانى قۇپتادىم. تەمىرتاۋ تۇرعىندارىنا تاماشا تارتۋ بولدى دەپ ويلايمىن. كومپانيا جاس مامانداردى وقىتۋعا جانە جۇمىسپەن قامتۋعا ارنالعان «بولاشاققا جول» الەۋمەتتىك باعدارلاماسىن قولعا الدى. ءبىرىنشى كەزەڭدە ەلىمىزدىڭ ءار ايماعىنان 500 گە جۋىق ادام قامتىلادى. بىلىكتى ماماندارعا، اسىرەسە، جۇمىسشى ماماندىق يەلەرىنە سۇرانىس ارتىپ كەلەدى. باعدارلاما، ەڭ الدىمەن، وسى ۇدەدەن شىعادى. بۇل باستاماعا باسقا ءدا ىرى كاسىپورىندار قوسىلادى دەپ ۇمىتتەنەمىن، - دەدى پرەزيدەنت.
بۇعان دەيىن مەملەكەت باسشىسىنا № 8 جانە № 9-جاڭا كوكس باتەرەيالارىنىڭ قۇرىلىسى جونىندە باياندالعانىن جازعانبىز.