قارقارالىدا ادامدارعا شاپقان قاسقىردان قۇتىرۋ اۋرۋى انىقتالدى

  قارقارالىدا مالدار مەن جانۋارلارعا قاتىستى شەكتەۋ ەنگىزىلدى. مۇنداي شاراعا قالادا كوزى جويىلعان قاسقىردىڭ ساراپتاماسىنان قۇتىرۋ اۋرۋىنىڭ انىقتالۋى سەبەپ بولىپ وتىر، دەپ حابارلايدى Kazinform ءتىلشىسى.

قارقارالىدا 2023 -جىلدىڭ 27-جەلتوقسانىنان باستاپ پروفيلاكتيكالىق ماقساتتا شەكتەۋ شارالارى جاريالاندى.

«استانا قالاسىنداعى ۆەتەريناريا بويىنشا ۇلتتىق رەفەرەنتتىك ورتالىعىندا قاسقىردىڭ ميىن زەرتتەگەندە قۇتىرۋ اۋرۋى انىقتالدى. وسىعان وراي قارقارالى قالاسىندا قۇتىرۋ اۋرۋىنا شەكتەۋ قويىلادى دەگەن ويدامىز»،-دەپ مالىمدەدى قارقارالى قالاسىنىڭ اكىمدىگى.

وسىعان بايلانىستى قالادا كەلەسىدەي شارالارعا تىيىم سالىنادى:

- يتتەر مەن مىسىقتاردىڭ كورمەسىن وتكىزۋگە، قۇتىرۋعا كۇدىكتى بولعان مالدىڭ ءونىمىن (ءسۇت، ەت، تەرى) شىعارىپ، تاسىمالداۋعا؛

- اۋىل شارۋاشىلىق جانۋارلارىن، يتتەر مەن مىسىقتاردى شىعارۋعا جانە تاسىمالداۋعا؛

پروفيلاكتيكالىق شارالار بارىسىندا يتتەر مەن مىسىقتاردى جانە باسقا دا جانۋارلاردى ۇستاۋ جاعدايىن تەكسەرۋ بويىنشا اۋلالاردى ارالاۋ جۇرگىزىلەتىن بولادى. اۋرۋعا كۇدىكتى بولعان جاعدايدا، دەزينفەكتسيا جۇرگىزىلەدى. سونداي- اق، بارلىق جانۋارلارعا (اۋىل شارۋاشىلىق جانۋارلارى، يت، مىسىق) قۇتىرۋ اۋرۋىنا قارسى ەكپە جاسالادى.

بۇل شەكتەۋ شارالارى شامامەن ءبىر ايعا ەنگىزىلەدى.

«بۇگىنگى كۇنگە قارقارالى قالاسى بويىنشا اۋىل شارۋاشىلىعى جانۋارلارى مەن يتتەردەن جانە مىسىقتاردان قۇتىرۋ اۋرۋى انىقتالعان جوق. ۇيدەگى مالدارىڭىز بەن يتتەرىڭىزدە قۇتىرۋ بەلگىلەرى بايقالسا، دەرەۋ اۋداندىق ۆەتەريناريالىق ينسپەكتسياعا 31939، ۆەتەريناريالىق ستانتسياعا 32304 نومەرىنە مىندەتتى تۇردە حابارلاسۋ كەرەك» - دەپ قوستى قالا اكىمدىگىنىڭ وكىلدەرى.

ەسكە سالساق، 21-جەلتوقساندا قارقارالى قالاسىنىڭ كوشەلەرىندە قاسقىر ادامدارعا شاۋىپ، ءۇش تۇرعىن اۋرۋحاناعا جۇگىنگەن بولاتىن.