«qarmet» كومبيناتى جۇمىسىن جاڭعىرتۋعا 35 ميلليارد تەڭگە بولمەك

استانا. قازاقپارات - «Qarmet» مەتاللۋرگيا كومبيناتىنىڭ جۇمىسىن قايتا جانداندىرۋ باعىتىندا ستراتەگيا ازىرلەنىپ جاتىر. بۇل تۋرالى ەكولوگيا جانە تابيعي رەسۋرستار مينيسترلىگى ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى ەربولات كوجيكوۆ ءمالىم ەتتى.

«Qarmet» اكسيونەرلەرى مەن ۇكىمەت اراسىنداعى كەلىسىم شەڭبەرىندە كومپانيانىڭ ءوندىرىستى جاڭعىرتۋ جانە قايتا قۇرۋ جونىندەگى مىندەتتەمە ناقتىلاندى. وسىلايشا ءوندىرىستى جاڭعىرتۋ ءۇشىن 35 ميلليارد تەڭگە ءبولۋ مىندەتى جۇكتەلدى. سوڭعى 6 اي ىشىندە كومپانيامەن بىرلەسىپ ءوندىرىستى جاڭعىرتۋ جونىندەگى ستراتەگيانى ازىرلەۋ جانە بەكىتۋ بويىنشا جۇمىستار جۇرگىزىلىپ جاتىر. اتالعان ستراتەگيا ءبىزدىڭ مينيسترلىك، دەنساۋلىق ساقتاۋ مينيسترلىگىمەن جانە باسقا دا ءتيىستى ۆەدومستۆولارمەن كەلىسىلدى»، - دەدى ەربولات كوجيكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

كوميتەت باسشىسىنىڭ ايتۋىنشا، اتالعان كاسىپورىن جۇمىسىن جاڭعىرتۋعا ارنالعان ستراتەگيا جاقىن ارادا بەكىتىلەدى.

ەسكە سالا كەتسەك، بيىل تامىزدا مەملەكەت باسشىسى قاسىم-جومارت توقايەۆ «Qarmet» اكسيونەرلىك قوعامىنىڭ ديسپەتچەرلىك-تالداۋ ورتالىعىنا بارىپ، احۋالمەن تانىسقان ەدى. سول جەردە كومپانيانىڭ باس ديرەكتورى ۆاديم باسين پرەزيدەنتكە كومىر ءوندىرىسى بولىمشەسىن دامىتۋ جونىندە باياندادى.

سونداي-اق، مەملەكەت باسشىسى بيىل قازاقستان حالقىنا جولداۋىندا «Qarmet» مەتاللۋرگيا كومبيناتىنداعى احۋال ەداۋىر تۇراقتالعانىن ايتتى.

اۆتور

داۋلەت ىزتىلەۋ