پرەزيدەنت سوزىندە قازاقستان-وتكەنگە زور قۇرمەتپەن، بولاشاققا ۇلكەن ۇمىتپەن قارايتىن بەيبىت ەل ەكەنىن اتاپ ءوتتى.
- ءبىز كەز كەلگەن قاقتىعىس ديپلوماتيالىق جولمەن، كەلىسسوزدەر ارقىلى شەشىلۋگە ءتيىس دەپ ەسەپتەيمىز، ءارقاشاندا «اس پەن تاس» ستراتەگياسىن جۇرگىزۋگە دايىن بولۋىمىز قاجەت. ءبىز حالىقارالىق قۇقىق قاعيداتتارى مەن نورمالارى قاتاڭ ساقتالۋى كەرەك دەپ سانايمىز. قازاقستان الەمنىڭ بارلىق ەلىمەن دوستىق قارىم- قاتىناسىن نىعايتا بەرەدى. وسى مىزعىماس ۇستانىمدار جاڭا اتا زاڭىمىزدا ناقتى ايقىندالدى. ءبىراق بۇل قامسىز وتىرۋ قاجەت دەگەن ءسوز ەمەس. ەلىمىز ءتۇرلى سىن-قاتەردىڭ الدىن الۋعا جانە كەز كەلگەن قاۋىپكە توتەپ بەرۋگە دايىن بولۋعا ءتيىس. سوندىقتان مەملەكەتىمىزدىڭ قورعانىس قابىلەتىن كۇشەيتىپ، اسكەرىمىزدى ەڭ ءبىرىنشى كەزەكتە تەحنولوگيالىق تۇرعىدان جاڭعىرتا بەرۋىمىز قاجەت. بۇل - قازىرگى تۇراقسىز، قۇبىلمالى زاماننىڭ تالابى، سونى ەسكەرە وتىرىپ، ەڭ الدىمەن، قارۋلى كۇشتەرىمىزدى جانە اسكەري مەكەمەلەرىمىزدى تۇبەگەيلى رەفورمالاۋ كەرەك. بۇل - ستراتەگيالىق ماڭىزى زور مىندەت، ونى سوزباي، ەكى جىل ىشىندە ورىنداۋ قاجەت،- دەدى قاسىم-جومارت توقايەۆ.
وسىعان دەيىن مەملەكەت باسشىسى قازاقستان ارمياسىن زامان تالابىنا ساي نىعايتۋ شارالارى قولعا الىنعانىن ايتتى.