قارۋلى كۇشتەرى قاتارىنداعى زاماناۋي تەحنيكا تانىستىرىلدى استاناداعى پارادتا
استانا. KAZINFORM - ەلورداداعى اسكەري پاراد كەزىندە ەلىمىزدىڭ قارۋلى كۇشتەرى قاتارىنداعى زاماناۋي تەحنيكا تانىستىرىلدى.
سالتاناتتى شەرۋدى قازاقستان قارۋلى كۇشتەرىنىڭ اسكەري تەحنيكاسى جالعاستىردى.
جالپى، ارميانى جاڭعىرتۋدا وتاندىق قورعانىس ونەركاسىبى كەشەنىنىڭ ماڭىزى زور. قازىرگى كەزدە ەلىمىزدە كوپتەگەن شەتەلدىك انالوگتاردان اسىپ تۇسەتىن قارۋ-جاراق پەن اسكەري تەحنيكانىڭ جاڭا ۇلگىلەرى شىعارىلادى. پارادتا بروندالعان ماشينالاردى، ءتۇرلى گاۋبيتسالاردى، جاۋىنگەرلىك ماشينالار مەن رەاكتيۆتى جۇيەلەردى، دالدىگى جوعارى زىمىران كەشەندەرىن، اۋە شابۋىلىنا قارسى قورعانىس قارۋ-جاراعىن، مينادان تازارتاتىن تەحنيكانى تاماشالاۋ مۇمكىندىگى بولدى.
«ارلان» كوپ فۋنكتسيونالدى ساۋىتتى دوڭگەلەكتى ماشينالارى «قازاقستان پاراماۋنت ينجينيرينگ» وتاندىق كاسىپورنىندا جاسالعان. قورعانىس مينيسترلىگى باسپا ءسوز قىزمەتىنىڭ مالىمەتىنشە، جاۋىنگەرلىك ماشينا اسكەري قىزمەتكە 2016 -جىلى قابىلداندى. كوپ قاباتتى ساۋىتى ەكيپاج بەن دەسانتتىڭ اتىس قارۋى مەن مينادان قورعايدى. ماشينانىڭ قۋاتتى قوزعالتقىشى جولسىز جەردە جۇرۋگە بەيىمدى، ال 14 توننا جاۋىنگەرلىك سالماعى جىلدامدىقتى ساعاتىنا 120 شاقىرىمعا دەيىن جەتكىزە الادى. 2024 -جىلدان باستاپ 15 «ارلان» ساۋىتتى دوڭگەلەكتى ماشيناسى گولان جوتالارىندا قازاقستان بىتىمگەرلىك كونتينگەنتىنىڭ جاۋىنگەرلىك مىندەتتەرىن ورىنداۋدى قامتاماسىز ەتىپ كەلەدى.
سونىمەن قاتار، شەرۋگە ت-72 تانكتەرى تارتىلدى. ول - قۇرلىق اسكەرلەرى قۇرامالارىنداعى نەگىزگى جاۋىنگەرلىك تەحنيكا. ماشينالار «قازاقستان ينجينيرينگ» كاسىپورنىندا تولىق جاڭعىرتۋدان وتكەن.
ال جاياۋ اسكەر جاۋىنگەرلىك ماشيناسى (ب م پ-2) كەز كەلگەن جاعدايدا، سونىڭ ىشىندە ءشولدى جانە تاۋلى جەرلەردە، سونداي-اق جاۋدىڭ ۇزدىكسىز اتىس اسەرىندە قولدانىلۋى مۇمكىن. ول سۋ كەدەرگىسىن ءجۇزىپ وتە الادى. جاۋىنگەرلىك ماشينادا 30 ميلليمەترلىك اۆتوماتتى زەڭبىرەك، تانككە قارسى باسقارىلاتىن زىمىراندار مەن پۋلەمەت ورناتىلعان. ول قۇرلىقتاعى جانە اۋە نىساندارىنا دا اتىس جۇرگىزە الادى.
مۇنىمەن قوسا، پاراد كەزىندە ب ت ر-82A جاڭا نۇسقاسى كورسەتىلدى. بۇل تەحنيكا جاقسارتىلعان بارلاۋ مۇمكىندىكتەرىنە يە. ب ت ر-دە 30 ميلليمەتر كاليبرلى جىلدام اتىلاتىن اۆتوماتتى زەڭبىرەك جانە 7,62 م م كاليبرلى جۇپتاستىرىلعان پۋلەمەت ورناتىلعان.
الاڭعا 240 م م وزدىگىنەن جۇرەتىن 2 س 4 «تيۋلپان» مينومەتى دە شىعارىلدى. بۇل قۋاتتى بەكىنىستەردىڭ ارتىندا تۇرعان كوماندالىق پۋنكتەر مەن جاۋ تەحنيكاسىن جويۋعا ارنالعان ەڭ قۋاتتى مينومەت جۇيەلەرىنىڭ ءبىرى.
سونداي-اق 122 ميلليمەتر كاليبرلى «گراد» دۇركىندەپ اتاتىن رەاكتيۆتى جۇيەلەرىنىڭ جاۋىنگەرلىك ماشينالارى - قۇرلىق اسكەرلەرىندەگى اڭىزعا اينالعان ارتيللەريالىق جۇيە. بۇل جۇيە اسكەرلەرگە كۇشتى اتىس قولداۋىن قامتاماسىز ەتە وتىرىپ، ۇرىس قيمىلدارىنداعى سەنىمدىلىگى مەن تيىمدىلىگىمەن كەڭىنەن تانىمال.
300 م م 9 ك 58 «سمەرچ» رەاكتيۆتى جۇيەسى ءبىر مەزگىلدە دۇركىندەپ اتۋ كومەگىمەن نىسانداردى دالدىكپەن جويۋعا ارنالعان. 12 باعىتتاۋشى قوندىرعى ءبىر وقتا 67 گەكتارعا دەيىنگى اۋماقتى قامتيدى.
پاراد كەزىندە كورەرمەندەر س-300 پ س زەنيتتىك- زىمىراندىق جۇيەسىن تاماشالادى. ال «بۋك- م 2 ە» زەنيتتىك زىمىران كەشەنى اۋە شابۋىلىنا قارسى قورعانىس اسكەرلەرىنىڭ ەڭ زاماناۋي كەشەندەرىنىڭ ءبىرى سانالادى.
«تور- م 2 ك» زەنيتتىك- زىمىران كەشەنى ۇشاقتاردى، تىكۇشاقتاردى، ۇشقىشسىز ۇشۋ اپپاراتتارىن، سونداي-اق قاناتتى زىمىراندار مەن راديولوكاتسياعا قارسى زىمىرانداردى قوسا العاندا، دالدىگى جوعارى قارۋلاردى ءتيىمدى انىقتاۋعا جانە سوققى بەرۋگە قابىلەتتى.
اسكەري شەرۋدە «Terrex 2 - بارىس- ا 8x8» مۋلتيفۋنكتسيونالدى جاۋىنگەرلىك ماشيناسى دا كورسەتىلدى. ول سۋدا ءجۇرۋ سيپاتتامالارى بويىنشا الەمدەگى ەڭ ۇزدىكتەردىڭ ءبىرى بولىپ سانالادى. تاكتيكالىق- تەحنيكالىق سيپاتتامالارىن ەسكەرە وتىرىپ، «Terrex» اسكەري-تەڭىز كۇشتەرىنىڭ دەسانتتىق-شابۋىلداۋ باتالونىن جاراقتاندىرۋدىڭ نەگىزگى ۇلگىسى رەتىندە ۇسىنىلادى.
«بارىس» بروندالعان دوڭگەلەكتى ماشينالارى قاشىقتان باسقارىلاتىن «سۇڭقار» جانە «اڭسار» جاۋىنگەرلىك مودۋلدەرىمەن قارۋلانعان. بۇل قازاقستاندىق «WSE» كومپانياسىنىڭ ماماندارى ازىرلەگەن جاڭا قارۋ-جاراق كەشەندەرى. «بارىس» اۋىر كاليبرلى سوققىلارعا جانە ارتيللەريالىق سناريادتاردىڭ سىنىقتارىنا توتەپ بەرە الاتىن كۇشەيتىلگەن برونعا يە. سونداي- اق، ماشينا مينالاردان قوسىمشا قورعانىسپەن جابدىقتالعان.
بۇدان بۇرىن حابارلانعانداي، ەلورداداعى «قازاق ەلى» الاڭىندا مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆتىڭ قاتىسۋىمەن ۇلى جەڭىستىڭ 80 جىلدىعىنا ارنالعان اسكەري پاراد ءوتىپ جاتىر.