قارجى مينيسترلىگى سىرتقى قارىزعا قاتىستى تۇسىنىك بەردى
استانا. KAZINFORM - قارجى ۆيتسە- ءمينيسترى ەرجان ءبىرجانوۆ ەلىمىزدىڭ سىرتقى قارىزىنا قاتىستى تۇسىنىك بەردى.
«ءبىز سىرتقى فاكتورلارعا كوبىرەك تاۋەلدىمىز جانە نەگىزىنەن شيكىزات جىبەرەمىز. ايتالىق، مۇناي، بيىل ءوندىرىس كولەمىنىڭ ازايۋى بايقالدى. ەكىنشىدەن، تاۋ- كەن مەتاللۋرگيا كەشەنى ونىمدەرى بويىنشا ايتارلىقتاي ءوسىم بولعان جوق، ەكسپورتتالاتىن ءبىرقاتار تاۋار بويىنشا باعانىڭ تومەندەۋى بايقالدى. ارينە، مۇنىڭ ءبارى بيۋدجەت تۇسىمدەرىنە اسەر ەتتى، سەبەبى ءتۇسىم ازايدى»، - دەپ ءتۇسىندىردى ەرجان ءبىرجانوۆ ءماجىلىس قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.
سونداي-اق، ۆيتسە-مينيستر كوكتەمگى سۋ تاسقىنىنا بيۋدجەتكە سالماق تۇسىرگەنىن ايتتى.
«تاسقىن بولاتىنى جوسپاردا جوعى انىق. تۇرعىن ۇيمەن قامتاماسىز ەتۋ ماسەلەنىڭ بىرەۋى عانا. وسى ورايدا بيۋدجەتتەن رەزەرۆتەر ارقىلى ينفراقۇرىلىم قارجىلاندىرىلدى جانە قالپىنا كەلتىرىلدى. تۇرعىن ۇيدەن بولەك، تىرشىلىكتى قامتاماسىز ەتىپ، وبەكتىلەردى قالپىنا كەلتىرۋ ماسەلەسى بار، بۇل دا مەملەكەتتىك بيۋدجەتكە سالماق ءتۇسىردى. بارلىق كوۆەنانت، قارىزدار بويىنشا نورمالار ساقتالادى جانە ولار نەگىزىنەن ينفراقۇرىلىمدىق جوبالارعا قاراجات جۇمسالادى. بۇل بولاشاقتا قوسىمشا جۇمىس ورىندارىن اشۋعا جانە بيۋدجەتتى تولىقتىرۋدى اكەلەدى دەگەن ءسوز. ءبىز بۇگىنگى كۇنمەن ءومىر سۇرمەۋىمىز كەرەك، سوندىقتان مۇنداي مەحانيزمدەر قابىلدانادى»، - دەيدى قارجى ءمينيسترىنىڭ ورىنباسارى.
ايتا كەتەيىك، ءماجىلىستىڭ قاراۋىنا «قازاقستان مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى جانە «قازاقستان مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى كەلىپ ءتۇستى. وسى ەكى قۇجات بويىنشا جالپى قارىز كولەمى 105 ميلليارد يەندى قۇرايدى.
اۆتور
داۋلەت ىزتىلەۋ