قاربىزدىڭ قابىعىن لاقتىرماڭىز: ماماندار ونىڭ 3 پايداسىن اتادى

قاربىزدان قالعان قابىقتى كوپشىلىگىمىز قوقىسقا لاقتىرۋعا اسىعامىز. الايدا ماماندار قاربىز قابىعىن قايتا پايدالانۋ ءارى ءتيىمدى، ءارى ەكولوگيالىق شەشىم ەكەنىن ايتادى، - دەپ حابارلايدى turkystan.kz ءتىلشىسى.

ماسكەۋ مەملەكەتتىك پەداگوگيكالىق ۋنيۆەرسيتەتىنىڭ تابيعي عىلىمدار فاكۋلتەتىنىڭ دەكانى مىندەتىن اتقارۋشى يرينا ليالينا «يزۆەستيا» باسىلىمىنا بەرگەن سۇحباتىندا قاربىز قابىعىنىڭ فوسفور مەن كاليگە باي ەكەنىن، بۇل ەلەمەنتتەر توپىراقتى جاقسارتىپ، وسىمدىكتەردىڭ وسۋىنە وڭ اسەر ەتەتىنىن ايتتى.

قاربىز قابىعىنان تىڭايتقىش جاساۋعا بولادى

ليالينا قاربىز قابىعىن كومپوستقا قوسۋعا نەمەسە «جىلى توسەنىش» ادىسىمەن قولدانۋعا كەڭەس بەرەدى. ول ءۇشىن قابىقتى جەردىڭ بەتىنە جايىپ، سۋ سەۋىپ، ارالاستىرىپ تۇرۋ كەرەك. مۇنداي ورگانيكالىق تىڭايتقىش قاراقات، تاڭقۋراي سياقتى جەمىس بۇتالارىنا وتە پايدالى. ەگەر قابىقتى مايدالاپ، كۇزدە بۇتالاردىڭ تۇبىنە توگەتىن بولساڭىز - تامىرى جاقسى قورەكتەنىپ، كەلەسى جىلى مول ءونىم بەرەدى.

شىرىش پەن ۇلۋلاردان قورعانۋعا كومەكتەسەدى

قاربىز قابىعى زيانكەستەرگە قارسى تابيعي قۇرال رەتىندە دە قولدانىلادى. تۇندە باقشاعا قابىقتىڭ ءىرى بولىكتەرىن تاستاساڭىز، تاڭەرتەڭ استىنان شىرىش پەن باسقا دا زيانكەستەردى بايقاۋعا بولادى.

ءۇي جانۋارلارىنا بەرۋگە دە بولادى

بۇزىلماعان قاربىز قابىعىن سيىر، ەشكى سياقتى ءۇي جانۋارلارىنىڭ جەمىنە قوسۋعا بولادى. ال شىعارماشىلىققا جانى جاقىن ادامدار ونى كەپتىرىپ، گۇل وتىرعىزاتىن ىدىس (كاشپو) رەتىندە قولدانا الادى.