قاراقشىلار ەر ادام مەن ونىڭ 12 جاستاعى جيەنىن بايلاپ، ءۇيدى توناعان
پەتروپاۆل. KAZINFORM - سولتۇستىك قازاقستان وبلىسىندا پوليتسەيلەر قاراقشىلىق شابۋىلعا كۇدىكتى تورتەۋدى ۇستادى. ولار تايىنشا اۋدانىندا تۇرعىننىڭ ۇيىنە باسا-كوكتەپ كىرىپ، شامامەن 640 مىڭ تەڭگەنىڭ دۇنيەسىن الىپ كەتكەن.
ۆەدومستۆونىڭ مالىمەتىنشە، قىلمىس 9-تامىزعا قاراعان ءتۇنى جاسالعان. بەلگىسىز ادامدار 41 جاستاعى اۋىل تۇرعىنىنىڭ ۇيىنە كىرىپ، ونى جانە 12 جاستاعى جيەنىن سكوتچپەن بايلاپ، ۇيدەگى بار اقشانى، ەكى ۇيالى تەلەفوندى جانە التىن بۇيىمداردى قولدى قىلعان.
قىلمىسكەرلەر ۇيدەن شىعىپ كەتكەننەن كەيىن بالا قولىنىڭ سكوتچىن تىسىمەن جۇلىپ، بوساعان. كەيىن جاقىن ماڭداعى ۋچاسكەلىك پوليتسيا ينسپەكتورىنىڭ ۇيىنە بارىپ، بولعان جاعداي تۋرالى حابارلاعان.
پوليتسيانىڭ بارلىق كۇشتەرى دەرەۋ كۇدىكتىلەردى ىزدەۋگە جۇمىلدىرىلدى. ءتارتىپ ساقشىلارى ەسەپتە تۇرعان ادامداردى تەكسەرىپ، اۋىلعا كەلگەن ادامدار مەن بوتەن كولىكتەر تۋرالى اقپارات جينادى.
«ناتيجەسىندە كۇدىكتى رەتىندە س ق و مەن اقمولا وبلىسىنىڭ 30 بەن 38 جاس ارالىعىنداعى ءتورت تۇرعىنى انىقتالدى. تايىنشا اۋدانىنىڭ پوليتسيا ءبولىمى جانە كريمينالدىق پوليتسيا باسقارماسىنىڭ جەدەل قىزمەتكەرلەرى ولاردى استانا قالاسىنىڭ اۋماعىندا ۇستادى. قازىرگى ۋاقىتتا ايىپتالۋشىنىڭ ۇشەۋى قاماۋعا الىندى. ۇرلانعاننىڭ ءبىر بولىگى تاركىلەنىپ، توناۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر»، - دەيدى س ق و پوليتسيا دەپارتامەنتى كريمينالدىق پوليتسيا باسقارماسىنىڭ باستىعى يۆان تەرزيدي.
كۇدىكتىلەردىڭ قاراقشىلىق شابۋىل جاساعانى دالەلدەنگەن جاعدايدا سوت ۇكىمىمەن ولار 7 جىلدان 12 جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
اۆتور
اقەركە داۋرەنبەك قىزى