قاراقالپاقستاندا ارالدى زەرتتەيتىن ورتالىق قۇرىلادى

استانا. KAZINFORM - ارال ايماعىنىڭ تۇراقتى دامۋىنا حالىقارالىق قاۋىمداستىقتى تارتۋ ماقساتىندا قاراقالپاقستاننىڭ مويناق قالاسىندا «ارال تابيعاتىنىڭ زەرتحاناسى» قۇرىلادى. سونداي- اق، ارالداعى ەكولوگيالىق ماسەلەلەر كورمەسى مەن كليماتتىق تەحنولوگيالاردىڭ «ارال القابى» كورمەسىن ۇيىمداستىرۋ جوسپارلانۋدا.

وزبەكستان رەسپۋبليكاسى پرەزيدەنتىنىڭ «2030 -جىلعا دەيىن ارال وڭىرىندە ەكولوگيالىق يننوۆاتسيالار مەن كليماتتىق تەحنولوگيالاردى ەنگىزۋ جونىندەگى قوسىمشا شارالار تۋرالى» شەشىمىنىڭ جوباسى دايىندالعان. بۇل تۋرالى مەملەكەتتەگى ەكولوگيا، قورشاعان ورتانى قورعاۋ جانە كليماتتىڭ وزگەرۋى مينيسترلىگى حابارلادى.

جوباعا سايكەس، «ەكولوگيالىق كاسىپكەرلىكتى» قولداۋ ماقساتىندا جەرگىلىكتى كليماتتىق ەرەكشەلىكتەرگە ءتوزىمدى وسىمدىك تۇرلەرىن وسىرۋگە، ەكسپورتقا شىعارىلاتىن ءونىمدى قايتا وڭدەۋگە جانە وندىرۋگە مامانداندىرىلعان «ارال القابى» كليماتتىق تەحنولوگيالىق ەكسپو-حابىن قۇرۋ جوسپارلانۋدا.

سونىمەن قاتار، ەكولوگيالىق ونىمدەردىڭ تۇقىمدارى مەن كوشەتتەرى پلانتاتسيالارىن ءوسىرۋ، اكەلۋ جانە ورناتۋ بويىنشا ستارتاپ جوبالارىنىڭ حالىقارالىق ىرىكتەۋىن ۇيىمداستىرۋ، جوبالاردى ىسكە اسىرۋ ءۇشىن جەرگىلىكتى جانە شەتەلدىك ينۆەستورلاردى تارتۋ، ەكسپورت بويىنشا كاسىپورىندارعا جەڭىلدەتىلگەن نەسيەلەر بەلگىلەۋ جانە قولداۋ جوسپارلانۋدا.

سونىمەن بىرگە، ارال وڭىرىندەگى كليماتتىق تۇراقتىلىقتى قامتاماسىز ەتۋ جانە ەكولوگيالىق پروبلەمالارعا ارنالعان Climate Expo كورمەسىن ۇيىمداستىرۋ جانە حالىقارالىق قاۋىمداستىقتى ارال ءوڭىرىنىڭ تۇراقتى دامۋىنا قاتىستىرۋ ءۇشىن مويناق اۋدانىندا اشىق اسپان استىنداعى «ارال تابيعاتى زەرتحاناسىن» قۇرۋ جوسپارلانۋدا.

ايتا كەتەيىك، ق ر ەكولوگيا جانە تابيعي رەسۋرستار مينيسترلىگى ارال اۋماعىندا ەكولوگيالىق احۋالدى جاقسارتۋ ءۇشىن 2025 -جىلعا دەيىن 1,1 ميلليون گەكتار جەرگە سەكسەۋىل ەگۋ جوسپارلانعانىن مالىمدەدى.

اۆتور
جاراسقان نۇرىبايەۆ