قاراشا ايىندا قازاقستاننىڭ ەڭبەك نارىعىنداعى بەلسەندىلىك تومەندەدى

قاراشا ايىندا ەلەكتروندىق ەڭبەك بيرجاسىندا (ە ە ب) 109 مىڭ بوس جۇمىس ورنى جانە 77 مىڭ تۇيىندەمە ورنالاستىرىلدى. قازان ايىمەن سالىستىرعاندا ەڭبەك نارىعىندا سۇرانىس پەن ۇسىنىس بەلسەندىلىگىنىڭ تومەندەۋى بايقالادى: بوس ورىندار سانى 17 پايىزعا (22,8 مىڭ بىرلىككە)، ال تۇيىندەمە 31 پايىزعا (34,5 مىڭ بىرلىككە) قىسقاردى، دەپ حابارلايدى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى.

جۇمىسكەرلەردى ىزدەۋ جانە جالداۋ پروتسەسىندە بەلسەندىلىكتىڭ ايتارلىقتاي تومەندەۋىنە قاراماستان، نەگىزگى جانە جالپى ورتا ءبىلىم بەرۋ كاسىپورىندارى ە ە ب-دا ورنالاستىرىلعان بوس جۇمىس ورىندارىنىڭ سانى بويىنشا كوشباسىنداعى ورنىن ساقتاپ قالدى(12 مىڭ بىرلىك).

«كاسىپتىك سالالار اراسىندا ت ك ش جانە اباتتاندىرۋ سالاسىندا بەلسەندىلىكتىڭ بارىنشا تومەندەۋى بايقالدى، وندا بوس ورىندار سانى 44 پايىزعا (1,9 مىڭ بىرلىككە) ازايدى. ءبىز مۇنى جىلىتۋ ماۋسىمىنا دايىندىق جۇمىستارىنىڭ اياقتالۋىمەن بايلانىستىرامىز. سونداي-اق، تۋريزم سالاسىندا سۇرانىستىڭ ايتارلىقتاي تومەندەۋى بايقالادى - بۇل باعىت بويىنشا بوس ورىندار 51 پايىزعا ازايدى (141 بىرلىككە)، ول تۋريستىك ماۋسىمنىڭ اياقتالۋىنا بايلانىستى بولۋى مۇمكىن»، - دەپ حابارلادى «ەردو» ا ق ستراتەگيا جانە ۇلكەن دەرەكتەردى تالداۋ دەپارتامەنتى ديرەكتورىنىڭ ورىنباسارى ۇلپان شەگەنوۆا.

سونىمەن قاتار، كەيبىر كاسىبي سالالاردا بوس جۇمىس ورىندارىنىڭ ءوسۋى بايقالدى. مىسالى، جەكە قىزمەتتەر مەن سەرۆيس سالاسىندا بوس ورىندار سانى 11 پايىزعا، 6,9 مىڭنان 7,7 مىڭعا دەيىن ءوستى، سونداي-اق ماركەتينگ جانە باق سالاسىندا ايتارلىقتاي ءوسىم بايقالدى - مۇندا بوس ورىندار سانى 144 پايىزعا، 716-دان 1,7 مىڭعا دەيىن ءوستى.

قاراشا ايىندا بوس ورىندار سانىنىڭ قىسقارۋ ءۇردىسى ەلىمىزدىڭ كوپتەگەن وڭىرلەرىنە اسەر ەتتى، بۇل اسىرەسە باتىس قازاقستان (-49 پايىز نەمەسە 4,7 مىڭ بوس جۇمىس ورنى)، قىزىلوردا (-40 پايىز نەمەسە 1,9 مىڭ بوس جۇمىس ورنى) جانە اتىراۋ (- 37 پايىز نەمەسە 2,6 مىڭ بوس جۇمىس ورنى) وبلىستارىندا ايقىن كورىندى.

جۇمىسشىلاردى ىزدەۋ جانە جالداۋ پروتسەسىنىڭ بەلسەندىلىگىنىڭ تومەندەۋى ءار وڭىردە ءارتۇرلى بولعانىن ايتا كەتكەن ءجون. ناتيجەسىندە كەيبىر وڭىرلەردە تاپشىلىق، ال باسقالارىندا كادرلار پروفيتسيتى پايدا بولدى.

ماسەلەن، شىعىس قازاقستان جانە قاراعاندى وبلىستارىندا ءۇش بوس ورىنعا ءبىر عانا تۇيىندەمەدەن كەلسە، ال ماڭعىستاۋ وبلىسى مەن شىمكەنت قالاسىندا ءبىر بوس ورىنعا ءبىر تۇيىندەمەدەن كەلەدى.

رەسپۋبليكا بويىنشا سانيتارلار (بوس ورىندار - 1,5 مىڭ بىرلىك، تۇيىندەمەلەر - 570 بىرلىك)، تاربيەشىلەردىڭ كومەكشىلەرى (بوس ورىندار - 1,3 مىڭ بىرلىك، تۇيىندەمەلەر - 332 بىرلىك)، سونداي-اق تاربيەشىلەردىڭ وزدەرى (بوس ورىندار - 2,1 مىڭ بىرلىك، تۇيىندەمەلەر - 1,3 مىڭ بىرلىك) تاپشى بولدى.

سونىمەن قاتار ءداستۇرلى تۇردە دەنە شىنىقتىرۋ جانە سپورت مۇعالىمدەرى، باستاۋىش سىنىپ مۇعالىمدەرى مەن زاڭگەرلەر ەڭ ۇلكەن باسەكەلەستىككە تاپ بولدى، ولاردا ءبىر بوس ورنىعا ءۇش تۇيىندەمەدەن كەلدى.

وتكەن ايداعىداي قاراشا ايىندا دا ورتاشا بىلىكتى جۇمىسكەرلەر جۇمىس بەرۋشىلەر اراسىندا ەڭ كوپ سۇرانىسقا يە بولىپ وتىر، ولاردى رەكرۋتينگ ءۇشىن 50,2 مىڭ بوس جۇمىس ورنى ورنالاستىرىلدى (ە ە ب-داعى بوس جۇمىس ورىندارىنىڭ جالپى سانىنىڭ 46 پايىز). بىلىكتىلىگى جوعارى ماماندار ءۇشىن بوس جۇمىس ورىندارىنىڭ سانى 30,4 مىڭدى (28 پايىز) قۇرادى، بوس جۇمىس ورىندارىنىڭ قالعان ۇلەسى (26 پايىز نەمەسە 28,5 مىڭ بىرلىك) بىلىكتىلىگى جوق ماماندارعا تيەسىلى بولدى.

«ەڭبەك نارىعىندا ۇسىنىستار بويىنشا دا وسىنداي جاعداي بايقالادى: تۇيىندەمەنىڭ جالپى سانىندا ورتا بىلىكتى مامانداردىڭ ۇلەسى كوش باستاپ تۇر. ماسەلەن، بىلىكتىلىگى ورتاشا جۇمىس ىزدەنۋشىلەردەن كەلىپ تۇسكەن تۇيىندەمە سانى 32,1 مىڭدى (ە ە ب-داعى تۇيىندەمەنىڭ جالپى سانىنىڭ 42 پايىز) قۇراسا، بىلىكتىلىگى جوعارى - 26,4 مىڭ (34 پايىز)، بىلىكتىلىگى جوق - 18,5 مىڭ (تيىسىنشە 24 پايىز) تۇيىندەمەنى قۇرادى»، - دەپ اتاپ ءوتتى ۇلپان شەگەنوۆا.

قاراشا ايىندا جۇمىس بەرۋشىلەر ءوندىرۋشى ونەركاسىپتەگى اۋىسىم باستىقتارىنا (ورتا ەسەپپەن 758 مىڭ تەڭگەدەن باستاپ)، تاۋار ساراپشىلارىنا (750 مىڭ تەڭگەدەن باستاپ) جانە ءوندىرۋشى ونەركاسىپتەگى بولىمشە باستىقتارىنا (737 مىڭ تەڭگەدەن باستاپ) ەڭ جوعارى جالاقى مولشەرىن ۇسىندى. بۇل رەتتە جۇمىس ىزدەۋشىلەر تاراپىنان ەڭ جوعارى جالاقىعا سۇرانىس ءوندىرۋشى ونەركاسىپ كاسىپورىندارىنىڭ قۇرىلىمدىق بولىمشەلەرىنىڭ ديرەكتورلارىنا (ورتا ەسەپپەن 1,6 ميلليون تەڭگەدەن)، ازاماتتىق اۆياتسيا ۇشقىشتارى مەن باس گەولوگتارىنا (تيىسىنشە 1,5 ميلليون تەڭگەدەن) تيەسىلى.

وسىلايشا، قاراشا ايىندا سۇرانىس پەن ۇسىنىستىڭ، ونىڭ ىشىندە ءبىرقاتار سالالارداعى ماۋسىمدىق جۇمىستاردىڭ اياقتالۋىنا بايلانىستى تومەندەۋى بايقالادى.