قاراڭعىدا كورۋگە، الىستى جاقىنداتۋعا مۇمكىندىك بەرەتىن اقىلدى لينزالار شىعارىلماق

لينزالار ەندى تەك كورۋ ءۇشىن قولدانىلمايدى. بىرنەشە جىلدان كەيىن ولار تۇندە كورۋ، zoom-فۋنكتسيا، دەنساۋلىق كورسەتكىشتەرىن باقىلاۋ جانە كەڭەيتىلگەن شىندىق (AR) ينتەرفەيسىن قامتيتىن تولىققاندى گادجەتكە اينالۋى مۇمكىن، دەپ حابارلايدى turkystan.kz باسىلىمى bloomberg.com-عا سىلتەمە جاساپ.

ءدال وسىنداي ماقساتتا جۇمىس ىستەپ جاتقان - Xpanceo ستارتاپى. كومپانيا تاياۋدا $250 ميلليون ينۆەستيسيا تارتىپ، $1,35 ميلليون دەڭگەيىندە باعالاندى. ستارتاپتىڭ نەگىزىن قالاۋشىلاردىڭ ءبىرى - رەسەيدەن شىققان كاسىپكەر. كوماندا قازىردىڭ وزىندە العاشقى جۇمىس ىستەيتىن پروتوتيپتەردى ۇسىندى جانە ءونىمدى 2027 -جىلى نارىققا شىعاراتىنىن مالىمدەدى.

Xpanceo جاساعىسى كەلەتىن قۇرىلعى - ءبىر عانا كونتاكت لينزا. ءبىراق ونىڭ فۋنكتسيالارى كوزىلدىرىكتى دە، سمارتفوندى دا، سمارت-ساعاتتى دا الماستىرا الادى. ياعني بۇل لينزادا:

 . تۇنگى كورۋ مۇمكىندىگى،
 . 10 ەسە جاقىنداتاتىن zoom،
 . جۇرەك سوعىسى، قانداعى قانت جانە باسقا دا بيومەتريكالىق كورسەتكىشتەر،
 . AR- ينتەرفەيس ارقىلى حابارلامالار مەن ناۆيگاتسيانى كورۋ سەكىلدى فۋنكتسيالار قامتىلادى.
ستارتاپتىڭ ايتۋىنشا، قۇرىلعى نەيروينتەرفەيسپەن دە جۇمىس ىستەي الادى - ياعني لينزا ءسىز نەگە نازار اۋدارعانىڭىزدى تۇسىنەدى جانە قاجەتتى اقپاراتتى ءدال سول ساتتە كورسەتەدى.

Xpanceo بۇل جوبامەن تەحنولوگيانى ادام دەنەسىنە تابيعي جولمەن بىرىكتىرۋدى كوزدەيدى. جوباعا قىزىعۋشىلىق تانىتىپ وتىرعان ينۆەستورلار قاتارىندا تاياۋ شىعىستاعى ءىرى قورلار بار.