قاراعاندى وبلىسىندا بالىق اۋلاۋعا شىققان ءۇش ادام قازا تاپتى

قاراعاندى. KAZINFORM - قايعىلى وقيعا ەسەن وزەنىندە بولعان. قۇتقارۋشىلار ەكى ەر ادام مەن ءبىر ايەلدىڭ دەنەسىن جاعادان بىرنەشە مەتر قاشىقتىقتان، سۋ استىنان تاپتى. الدىن الا بولجام بويىنشا، بالىقشىلار ءالى تولىق قاتپاعان مۇز ويىلىپ، سۋعا ءتۇسىپ كەتكەن.

Фото: freepik

17-قاراشا كۇنى تاڭەرتەڭ شاحتينسك قالاسىنىڭ ءۇش تۇرعىنى بالىق اۋلاۋعا اتتانعان. ساعات 06:00 شاماسىندا 1959 جانە 1963 -جىلى تۋعان ەكى ەر ادام مەن 1963 -جىلى تۋعان ايەل بورودينوۆكا اۋىلىنان وڭتۇستىككە قاراي شامامەن 15 شاقىرىم جەردە ورنالاسقان ەسەن وزەنىنە بارعان. الايدا ۇشەۋى دە ۇيىنە ورالماعان.

جوعالعان ادامدار تۋرالى حابار قاراعاندى وبلىسىنىڭ توتەنشە جاعدايلار دەپارتامەنتىنە ساعات 23:40-تا تۇسكەن. قۇتقارۋشىلار دەرەۋ ىزدەستىرۋ- قۇتقارۋ جۇمىستارىن ۇيىمداستىردى. ىزدەۋ جۇمىستارى تۇنگى ۋاقىتتا جۇرگىزىلىپ، وزەن اكۆاتورياسى مەن جاعالاۋ اۋماعىن تۇگەل تەكسەرۋ قاجەتتىگىنە بايلانىستى ءبىرشاما قيىنداعان.

- حابار تۇسكەن بويدا وقيعا ورنىنا توتەنشە جاعدايلار دەپارتامەنتىنىڭ كۇشتەرى مەن قۇرالدارى جىبەرىلدى. جوعالعانداردى ىزدەۋگە ۇشقىشسىز ۇشۋ اپپاراتى، جىلۋ تۇسىرەتىن ءدۇربى، سۇڭگۋىرلىك جابدىقتار جانە Starlink سپۋتنيكتىك بايلانىس جۇيەسى جۇمىلدىرىلدى. 18-قاراشا كۇنى ساعات 01:18- دە قۇتقارۋشىلار ءۇش ادامنىڭ دا دەنەسىن تاۋىپ، سۋدان الىپ شىقتى، - دەپ حابارلادى قاراعاندى وبلىسىنىڭ توتەنشە جاعدايلار دەپارتامەنتى.

مارقۇمداردىڭ دەنەسى جاعادان شامامەن 10 مەتر قاشىقتىقتا، 2,5 مەتر تەرەڭدىكتەن تابىلعان. ىزدەستىرۋ- قۇتقارۋ جۇمىستارىنا ت ج د-نىڭ ءتورت قىزمەتكەرى، التى قۇتقارۋشى، كينولوگيالىق توپ جانە ءتورت تەحنيكا جۇمىلدىرىلدى. سونىمەن قاتار ىزدەۋ جۇمىستارىنا پوليتسيا قىزمەتكەرلەرى، جەرگىلىكتى اتقارۋشى ورگانداردىڭ وكىلدەرى مەن جوعالعانداردىڭ تۋىستارى دا قاتىستى.

الدىن الا مالىمەت بويىنشا، مۇز ويىلىپ، بالىقشىلار سۋعا ءتۇسىپ كەتكەن. ولاردىڭ ۇستىندە قۇتقارۋ كەۋدەشەلەرى بولماعان. قازىر وقيعانىڭ ءمان-جايى انىقتالىپ جاتىر.

قاراعاندى وبلىسىنىڭ توتەنشە جاعدايلار دەپارتامەنتى سۋ ايدىندارىندا مۇز ەندى قاتا باستاعان كەزەڭدە ونىڭ ۇستىنە شىعۋ اسا ءقاۋىپتى ەكەنىن ەسكەرتەدى. ءتىپتى جاعالاۋعا جاقىن جەردىڭ وزىندە مۇز جۇقا بولىپ، ادام سالماعىن كوتەرە الماۋى مۇمكىن.

قۇتقارۋشىلار تۇرعىنداردى ءالى تولىق قاتپاعان مۇزدىڭ ۇستىنە شىقپاۋعا جانە بالىق اۋلاۋ كەزىندە قاۋىپسىزدىك تالاپتارىن ساقتاۋعا شاقىرادى. اسىرەسە، قۇتقارۋ كەۋدەشەسىن كيۋدىڭ ماڭىزى زور.

ەسكە سالايىق، بۇعان دەيىن ش ق و-دا بيىل بالىق اۋلاپ جۇرگەن 6 ادام سۋعا باتىپ كەتكەنىن جازعانبىز.