وڭىردە قۇقىق بۇزۋشىلارعا قاتىستى جاڭا شەكتەۋلەر دە قاراستىرىلىپ جاتىر. اتاپ ايتقاندا، الكوگول ونىمدەرىنە اكتسيز مولشەرىن ارتتىرۋ، سونداي-اق قۇقىقبۇزۋشىلىقتار ءجيى تىركەلەتىن دۇكەندەر مەن كوڭىل كوتەرۋ ورىندارى ءۇشىن ارنايى انتيرەيتينگ ەنگىزۋ ۇسىنىلىپ وتىر.
قاراعاندى وبلىسىندا «ىشىمدىكسىز اۋىل» جوباسى اياسىندا 74 اۋىل الكوگولدەن تولىقتاي باس تارتقان.
پوليتسيانىڭ مالىمەتىنشە، بۇل باستاما ايتارلىقتاي الەۋمەتتىك ناتيجە بەرگەن. اتالعان ەلدى مەكەندەردە تۇرمىستىق جانجالدار مەن سپيرتتىك ىشىمدىك تۇتىنۋعا بايلانىستى قىلمىستار تىركەلمەگەن.
وبلىستىق پوليتسيا دەپارتامەنتىنىڭ باستىعى نىعمەت يسماعۇلوۆتىڭ ايتۋىنشا، وڭ وزگەرىستەر جوبانى ءوڭىر بويىنشا ءارى قاراي كەڭەيتۋگە نەگىز بولعان.
- بۇل اۋىلداردا وتباسىلىق-تۇرمىستىق جانجالدار مەن الكوگول تۇتىنۋعا بايلانىستى قىلمىستار تىركەلمەيدى. سوندىقتان جوبانى ودان ءارى اۋقىمدى تۇردە جالعاستىرۋ ۇسىنىلادى، - دەدى دەپارتامەنت باسشىسى.
قۇقىق قورعاۋ ورگاندارىنىڭ مالىمەتىنشە، قازىرگى تاڭدا تۇرمىستىق زورلىق- زومبىلىقتىڭ، قوعامدىق ءتارتىپتى بۇزۋدىڭ جانە الكوگول ونىمدەرىن زاڭسىز ساتۋدىڭ الدىن الۋعا ەرەكشە كوڭىل ءبولىنىپ وتىر.
بيلىك وكىلدەرى ىشىمدىكتەن باس تارتۋ تەك قىلمىس دەڭگەيىن تومەندەتىپ قانا قويماي، اۋىلدارداعى جالپى قوعامدىق احۋالدى جاقسارتۋعا دا ىقپال ەتەدى دەپ سانايدى.
سونىمەن قاتار مەملەكەتتىك دەڭگەيدە الكوگول نارىعىن رەتتەۋگە قاتىستى قوسىمشا شارالار تالقىلانىپ جاتىر. ۇسىنىستار قاتارىندا سپيرتتىك ونىمدەرگە سالىناتىن اكتسيزدەردى كوتەرۋ، ساۋدا ورىندارىن باقىلاۋدى كۇشەيتۋ جانە كاسىپكەرلەرگە قويىلاتىن تالاپتاردى قاتاڭداتۋ بار.
اسىرەسە قوعامدىق ءتارتىپ ءجيى بۇزىلاتىن اۋلا دۇكەندەرى مەن ويىن-ساۋىق ورىندارى ەرەكشە باقىلاۋعا الىنۋى مۇمكىن. مۇنداي نىساندار ءۇشىن ارنايى انتيرەيتينگ ەنگىزۋ ۇسىنىلىپ وتىر. جۇيەلى تۇردە تىركەلەتىن قۇقىقبۇزۋشىلىقتار ساۋدا ورىندارىنىڭ ءارى قاراي جۇمىس ىستەۋىنە جانە بەدەلىنە اسەر ەتۋى ىقتيمال.
پوليتسيا وكىلدەرى مۇنداي باستامالاردىڭ باستى ماقساتى نەگىزسىز تىيىم سالۋ ەمەس، تۇرعىندار ءۇشىن قاۋىپسىز ورتا قالىپتاستىرۋ جانە ماس كۇيىندە جاسالاتىن قىلمىستار سانىن ازايتۋ ەكەنىن اتاپ ءوتتى.
وسىعان دەيىن قىزىلوردا وبلىسىندا ىشىمدىكسىز اۋىلدار سانى 37 گە جەتكەنىن حابارلاعان بولاتىنبىز.