قاراعاندىلىقتار سابا پىسكەن اجەيدىڭ ءۇش مەترلىك ءمۇسىنىن جاسادى
استانا. KAZINFORM - قاراعاندى وبلىسىنىڭ شەبەرلەرى حالىقارالىق فەستيۆالدە سابا ءپىسىپ وتىرعان اجەيدىڭ ءۇش مەترلىك ءمۇسىنىن جاساپ شىعاردى، دەپ حابارلايدى وبلىس اكىمدىگىنىڭ باسپا ءسوز قىزمەتى.
شىمكەنتتە وتكەن حالىقارالىق اعاش كەسۋ فەستيۆالىنە قازاقستان، وزبەكستان، قىرعىزستان، موڭعوليا، رەسەي جانە بەلارۋس ەلدەرىنىڭ شەبەرلەرى قاتىستى. قاراعاندى وبلىسىنىڭ نامىسىن اۋباكىر يسمايلوۆ اتىنداعى بالالار كوركەمسۋرەت مەكتەبىنىڭ وقىتۋشىلارى ەرسىن تەمىرعاليەۆ پەن جاڭابەك جۇمابەكوۆ بىرىكتىرگەن شاحتينسك قالاسىنىڭ «سارىارقا- قاراكەسەك» دۋەتى قورعادى. ولار ۇلتتىق ستيلدە ءۇش مەترلىك ءمۇسىن جاساپ، تۇتاس بالقاراعاي اعاشىنان سابا ءپىسىپ وتىرعان قارت ايەلدى كەسىپ جاسادى.
- ءبىز اعاشتان ويۋ-ورنەك ويۋمەن بۇرىننان اينالىسىپ كەلەمىز، ءبىراق بۇعان دەيىن تەك ۇساق نارسەلەر بولاتىن. اۋقىمدى جۇمىسقا العاش رەت 2024 -جىلى التايداعى فەستيۆالدە كىرىستىك. ءبىزدىڭ كوماندا سول جەردە قۇرىلدى. بۇعان دەيىن تەك كەسكىندەمە فەستيۆالىنە قاتىسقان ەدىك. قىستا ءبىز مۇزدان فيگۋرالار جاسايمىز. كەيدە بىزگە بەتوننان جاسالعان شاعىن پىشىندەرگە تاپسىرىس تۇسەدى، - دەدى ەرسىن تەمىرعاليەۆ.
بۇل جولى قىمىز - بيە سۇتىنەن جاسالعان ۇلتتىق سۋسىندى كۇبىدە ءپىسىپ وتىرعان قارت ايەلدىڭ بەينەسىن تاڭداۋ تۋرالى شەشىم قابىلداعان. يدەيا - قازاقتىڭ قوناقجايلىلىق داستۇرلەرىن كورسەتۋ. ۇلتتىق ويۋ-ورنەكتەر دە ۇمىت قالمادى، ولاردى كيمەشەك پەن كۇبىگە ويىپ جاساعان. ساۋساققا اشەكەي - ءىرى ساقينا قوسىلدى.
ۇيىمداستىرۋشىلار مەن باسقا دا سۋرەتشىلەر شاحتينسك شەبەرلەرىنىڭ جۇمىس ساپاسى مەن كۇردەلىلىگىن اتاپ ءوتتى. شارا سوڭىندا فەستيۆال قاتىسۋشىلارىنا ديپلومدار مەن اقشالاي سىيلىقتار تابىس ەتىلدى.
بۇدان بۇرىن ەرتىس بويىندا تىگىلگەن الىپ كيمەشەك حالىقارالىق رەكوردتار كىتابىنا ەنگەنىن جازعانبىز.