قاراعاندىدا زووباق قىزمەتكەرلەرى ارىستاننىڭ ەكى كۇشىگىن ساتپاق بولعان

قاراعاندى. KAZINFORM - قاراعاندى حايۋاناتتار باعىنىڭ ءۇش قىزمەتكەرى ارىستاننىڭ ەكى كۇشىگىن ساتۋعا ارەكەت ەتكەنى ءۇشىن ءۇش جىلعا باس بوستاندىعىن شەكتەۋ جازاسىن الدى.

قاراعاندى قالاسى قازىبەك بي اۋداندىق سوتى ارىستاننىڭ ەكى كۇشىگىن ۇرلاپ، ساتپاقشى بولعان قالالىق حايۋاناتتار باعىنىڭ ءۇش قىزمەتكەرىنە قاتىستى ءىستى قارادى.

ولار وزدەرىنىڭ قىزمەتتىك جاعدايىن پايدالانا وتىرىپ، ەرەكشە قورعالاتىن تابيعي اۋماقتا الدىن الا ءسوز بايلاسۋ ارقىلى قازاقستاننىڭ حالىقارالىق شارتتارىمەن رەتتەلەتىن جانۋاردى زاڭسىز ساتۋعا ارەكەت جاسادى دەپ ايىپتالدى.

بەلگىلى بولعانداي، ولار بۇل قىلمىستى 2023 -جىلدىڭ جازىندا ىسكە اسىرۋعا ارەكەت ەتكەن، ءبىراق بۇل جايلى پوليسيا قىزمەتكەرلەرى ءبىلىپ قويعان.

سوتتالۋشىلاردىڭ كىناسى زاتتاي دالەلدەمەلەرمەن، كۋاگەرلەردىڭ ايعاقتارىمەن جانە ءىس بويىنشا جينالعان باسقا دا دالەلدەمەلەرمەن دالەلدەنگەن.

«سوت جازانى جەڭىلدەتەتىن ءمان-جاي رەتىندە مىنا دەرەكتەردى قاراستىردى: كەلگەن زالالدىڭ تولىق وتەلۋى، ەكى سوتتالۋشىنىڭ اسىراۋىندا كامەلەتكە تولماعان بالالار بار، ال ءۇشىنشى - 2 توپتاعى مۇگەدەك. سوتتالۋشىلاردا جازانى اۋىرلاتاتىن ءمان-جاي جوق»، - دەپ حابارلادى قاراعاندى قالاسى قازىبەك بي اۋداندىق سوتىنىڭ باسپا ءسوز قىزمەتى.

ايتا كەتۋ كەرەك، سوتتالۋشىلاردىڭ ءىس-ارەكەتتەرى ارىستان كۇشىكتەرىنىڭ قۇنىن انىقتاۋ بويىنشا سوت-تاۋار ساراپتاماسى جۇرگىزىلگەننەن كەيىن قايتا قارالىپ، زالال كولەمى ۇلكەن مولشەرگە جاتپايتىنى انىقتالدى.

سونداي-اق جابىرلەنۋشى تاراپ زالالدى تولىق كولەمدە وتەۋگە جانە تاتۋلاسۋعا بايلانىستى وسى باپ بويىنشا قىلمىستىق ءىستى توقتاتۋ تۋرالى ءوتىنىش ءبىلدىردى.

«سوت ۇكىمىمەن ايىپتالۋشىلار ق ر ق ك-ءنىڭ 24-بابى، 2،3،4-تارماقتارىنىڭ 3-339-بولىگى 2-بولىگى بويىنشا كىنالى دەپ تانىلدى جانە ولارعا 3 -جىل باس بوستاندىعىن شەكتەۋ تۇرىندەگى جازا تاعايىندالدى. سونداي- اق ولارعا 2 -جىل مەرزىمگە جابايى جانۋارلارمەن جۇمىس ىستەۋگە بايلانىستى قىزمەتپەن اينالىسۋ قۇقىعىنان ايىرۋ تۇرىندە قوسىمشا جازا تاعايىندالدى»، - دەپ حابارلادى قاراعاندى قالاسى قازىبەك بي اۋداندىق سوتىنىڭ باسپا ءسوز قىزمەتى.

سوت ۇكىمى زاڭدى كۇشىنە ەنگەن جوق.