الەۋمەتتىك جەلىلەردە تاراعان بەينەجازبادا جاس ءوسپىرىمنىڭ كوپقاباتتى ءۇيدىڭ توبەسىنە كىرپىشتەردى قاساقانا قويعانى كورسەتىلگەن. پوليتسيا جەدەل تۇردە ونىڭ جەكە باسىن انىقتادى.
بۇزاقىلىق ارەكەتكە بارعان 15 جاستاعى قالا تۇرعىنى اتا-اناسىنىڭ بىرىمەن بىرگە پوليتسيا بولىمىنە جەتكىزىلدى.
- جاسوسپىرىممەن پروفيلاكتيكالىق اڭگىمە جۇرگىزىلىپ، ول ىشكى مەكتەپ ەسەبىنە قويىلدى. ال ونىڭ زاڭدى وكىلىنە قاتىستى «كامەلەتكە تولماعاننىڭ ۇساق بۇزاقىلىق جاساۋى» بابىمەن اكىمشىلىك ءىس قوزعالىپ، ماتەريالدار سوتقا جولداندى، - دەلىنگەن اقپاراتتا.
پوليتسيا مۇنداي ارەكەتتەردىڭ جولى قاتاڭ كەسىلەتىنىن ەسكەرتەدى. قوعامدىق قاۋىپسىزدىككە قاتەر توندىرەتىن كەز كەلگەن ءىس-ارەكەت ءۇشىن قۇقىق بۇزۋشىلار دەرەۋ انىقتالىپ، زاڭعا سايكەس جاۋاپقا تارتىلادى.
اۆتور
اسحات رايقۇل