قاراعاندىدا 40 باس جىلقىنى ساتپاق بولعان 2 ادام قولعا ءتۇستى
قاراعاندى. قازاقپارات – 2-قاراشا كۇنى تاڭعى ساعات 04:00 شاماسىندا قاراعاندى قالاسىنا كىرە بەرىستە ورنالاسقان بەكەتتە تۇرعان پوليتسيا قىزمەكتەرلەرى 57 جاستاعى ازاماتتىڭ باسقارۋىنداعى كاماز اۆتوكولىگىن توقتاتتى.
كولىك ىشىندە جۇرگىزۋشىمەن قوسا 57 جاستاعى ازامات جانە ونىڭ 29 جاستاعى ۇلى بولعان. ال كولىكتەن 40 باس جىلقى انىقتالدى.
Polisia.kz ءتىڭ مالىمەتىنشە، تەكسەرىس كەزىندە جىلقىلاردىڭ 57 جاستاعى ازاماتقا تيەسىلى ەكەنىن انىقتايتىن قۇجاتتارى بولماعان. ولاردىڭ جىلقىلاردى اقتوعاي اۋدانىنا قاراستى قىستاقتاردىڭ بىرىنەن قالاعا ساتۋعا اكەلە جاتقانى بەلگىلى بولدى.
جىلقىلاردىڭ ناقتى كىمگە تيەسىلى ەكەنىن انىقتاۋ ماقساتىندا كولىك پوليتسيا بولىمىنە جەتكىزىلدى.
كريمينالدىق پوليتسيا قىزمەتكەرلەرى جىلقىلاردى سۋرەتكە ءتۇسىرىپ، اقتوعاي اۋداندىق پوليتسيا بولىمىنە جولداپ، كەيىن ولار اۋىل تۇرعىندارى وتىراتىن WhatsApp چاتقا تاراتقان. سونىڭ ناتيجەسىندە اۋدان تۇرعىندارىنىڭ جىلقىسىن باعاتىن باقتاشى وزىنە تيەسىلى ەكى جىلقىنى تانىدى.
قازىرگى ۋاقىتتا بارلىق جىلقى ۇشتوبە اۋىلىنداعى ۇيلەردىڭ ءبىرىنىڭ قوراسىنا ءتۇسىرىلىپ، ول جەرگە پوليتسيا قىزمەتكەرلەرى كۇزەت قويدى.
اتالعان دەرەك بويىنشا قىلمىستىق ءىس قوزعالدى. ءتارتىپ ساقشىلارى قىلمىستىق ءىستىڭ نەگىزىندە باسقا دا جابىرلەنۋشىلەردى جانە قىلمىسقا قاتىستى تۇلعالاردى انىقتاۋ بويىنشا كەشەندى ءىس- شارالاردى جۇرگىزىپ جاتىر.