قاراعاندى وبلىسىنىڭ جولدارىنا باقىلاۋ بەكەتتەرى قويىلدى

استانا. KAZINFORM - قاراعاندى وبلىسىنىڭ جولدارىندا 18 جىلجىمالى باقىلاۋ بەكەتى قويىلدى. بۇل تۋرالى وبلىستىق جول پوليتسياسى باسقارماسىنىڭ باسپا ءسوز قىزمەتى حابارلادى.

پوليسيا قىزمەتكەرلەرى ءتيىستى قۇجاتتاردى تەكسەرۋ ءۇشىن ەت پەن مال تاسىمالداۋشى كولىكتەردى توقتاتادى.

جىل باسىنان بەرى وبلىستا 25 مال ۇرلىعى تىركەلسە، ونىڭ 18 ءى اشىلعان. سوڭعى وقيعالاردىڭ ءبىرى وتكەن اپتادا بۇقار جىراۋ اۋدانىندا بولىپ، پوليتسيا قىزمەتكەرلەرى گولشتەين تۇقىمدى سيىرىن ۇرلاعان كۇدىكتىنى ۇستادى. جابىرلەنۋشىگە كەلتىرىلگەن شىعىن 1 ميلليون تەڭگەنى قۇرادى. اتالعان فاكتى بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.

مال ۇرلىعىنىڭ كوبى ەركىن جايىلىمدا جاسالادى، سول سەبەپتى مال يەلەرى شىعىندى بىردەن بايقاماي قالىپ جاتادى.

پوليسياعا ەركىن جايىلىپ جۇرگەن مالدىڭ جوعالعانى تۋرالى 17 حابارلاما كەلىپ تۇسكەن. جەدەل ءىس- شارالار ناتيجەسىندە پوليتسەيلەر 106 باس مال، ونىڭ ىشىندە 56 جىلقى، 12 ءىرى قارا جانە 38 ۇساق ءمۇيىزدى مال تاپتى.

قاراعاندى وبلىسىنىڭ پوليتسيا دەپارتامەنتى تۇرعىنداردى ازاماتتار مۇلكىنىڭ ساقتالۋى مەن قاۋىپسىزدىگىن قامتاماسىز ەتۋگە باعىتتالعان شارالارعا تۇسىنىستىكپەن قاراۋعا شاقىرادى.