قاراعاندى وبلىسىندا جەدەل جاردەم جۇرگىزۋشىسىن ۇرعان ەر ادام ۇستالدى

قاراعاندى. KAZINFORM - قاراعاندى وبلىسىنىڭ پوليتسەيلەرى جەدەل جاردەم جۇرگىزۋشىسىن ۇرعان ەر ادامدى ۇستادى. ول وبلىس ورتالىعىنان 200 شاقىرىم قاشىقتىقتا ورنالاسقان قىستاقتا جاسىرىنعان، دەپ حابارلايدى Kazinform ءتىلشىسى.

«جۇرگىزىلگەن كەشەندى جەدەل- ىزدەستىرۋ ءىس-شارالارىنىڭ ناتيجەسىندە پوليتسيا قىزمەتكەرلەرى وبلىس ورتالىعىنان 200 شاقىرىم قاشىقتىقتا ورنالاسقان اۋىلداردىڭ بىرىنەن، «جەدەل جاردەم» جۇرگىزۋشىسىنە بۇزاقىلىق ارەكەتپەن قاساقانا زيان كەلتىرگەن 36 جاستاعى كۇدىكتىنى ۇستادى»، - دەپ مالىمدەدى قاراعاندى وبلىسىنىڭ پ د باستىعىنىڭ ورىنباسارى ءابىل ءابىلدين.

بۇزاقى ۋاقىتشا ۇستاۋ يزولياتورىنا قامالدى. قىلمىستىق ءىستى تەرگەۋ قاتاڭ باقىلاۋدا.

ەسكە سالساق، 27-قاڭتاردا ەر ازامات شاقىرۋعا كەلگەن دارىگەرلەر بريگاداسىنىڭ جۇرگىزۋشىسىمەن سوزگە كەلىپ قالعان. سودان سوڭ اشۋلانىپ، جۇدىرىق الا جۇگىرگەن. بۇل داۋعا ەر ادامنىڭ اۋلا جولىمەن وتە الماعانى سەبەپ بولعان.

اۆتور

ايزادا اگيلبايەۆا