قاراعاندى وبلىسى بيىل ءۇش تريلليون تەڭگەنىڭ ءونىمىن ءوندىردى

استانا. KAZINFORM - قاراعاندى وبلىسىنىڭ ەكونوميكاسى بارلىق سالا بويىنشا قارقىندى دامىپ كەلەدى. بيىل ءوڭىر كاسىپورىندارى 3 تريلليون تەڭگەنىڭ ءونىمىن ءوندىردى. ال تارتىلعان ينۆەستيتسيا كولەمى بىلتىرعا قاراعاندا 14 پروتسەنتكە ارتتى.

جىل سوڭىنا دەيىن 10 ينۆەستيتسيالىق جوبا جۇزەگە اسىرىلادى. قاراعاندى وبلىسى «ىسكەرلىك كليمات» تاۋەلسىز رەيتينگىندە رەسپۋبليكادا 7-ورىندا تۇر. وڭىردە شاعىن جانە ورتا بيزنەستى دامىتۋعا جان-جاقتى قولداۋ كورسەتىلگەن، دەدى وبلىس اكىمى ەرماعانبەت بولەكپايەۆ. ارنايى شاعىن وندىرىستىك ايماقتاردا بيزنەس وكىلدەرى ارزانعا ورىن جالداپ، كاسىبىن دوڭگەلەتە الادى. وسىنداي يندۋستريالدى ايماقتار قاراعاندى جانە ساران قالالارىندا قۇرىلعان.

ەرماعانبەت بولەكپايەۆ، وبلىس اكىمى:

- «دامۋ» قورى ارقىلى كوپتەگەن باعدارلامار جۇزەگە اسىرىلىپ جاتىر. ءبىزدىڭ وڭىردە «كاسىپكەر» باعدارلاماسى ويداعىداي جۇمىس ىستەپ تۇر. مەملەكەتتىك قولداۋىنىڭ ارقاسىندا كاسىپكەرلەر سۋبسيديا الادى. كوتەرمە ساۋداعا سالىقتى 2 پايىزعا دەيىن تومەندەتتىك. ەل بويىنشا وسىنداي جەڭىلدىك جاساپ جاتقان ءبىز عانا.

ساۋدا-لوگيستيكالىق قويمالارىندا 8 مىڭ ادام ەڭبەك ەتەدى

ەرماعانبەت بولەكپايەۆ ءوڭىردىڭ لوگيستيكالىق دامۋ مۇمكىندىكتەرىنە دە توقتالدى. قاراعاندىدا زاماناۋي تالاپتارعا ساي ساۋدا- لوگيستيكالىق قويمالارى جۇمىس ىستەي باستادى. مۇندا كەلەشەكتە 8 مىڭ ادام ەڭبەك ەتەدى. وسىلايشا تاۋار وندىرۋشىلەرگە ءونىمدى ساقتاۋ، جەدەل جەتكىزۋ قىزمەتتەرى ۇسىنىلادى.

ەرماعانبەت بولەكپايەۆ، وبلىس اكىمى:

- لوگيستيكالىق قىزمەتپەن اينالىساتىن كومپانيانىڭ جوسپارى اۋقىمدى. قازىر ولارعا قوسىمشا جەر تەلىمدەرىن قاراستىرىپ جاتىرمىز. وندا جوعارعى «ا» ساناتىنا جاتاتىن قويمالار سالىنادى. بولاشاقتا كەز كەلگەن مەملەكەتكە قىسقا مەرزىمدە تاۋار جەتكىزۋدىڭ وزىق جۇمىسى جولعا قويىلادى. قازىر قاراعاندى اۋەجايىنان كوممەرتسيالىق رەيستەر دە ۇشادى. ەكۆادور، نيدەرلاند، بەلگيا جانە وڭتۇستىك- شىعىس ازيا ەلدەرىنەن ۇشاقتار قاتىنايدى. كەلەشەكتە قىتاي- ەۋروپا- قىتاي باعىتىندا اۋە كەمەلەرى دە ۇشاتىن بولادى. بۇل ءوڭىردىڭ لوگيستيكالىق الەۋەتىن ارتتىرۋعا سەپتىگىن تيگىزبەك.

24.kz