قاراعاندى-الماتى تاسجولىنداعى جول اپاتىنان 7 ادام كوز جۇمدى

قاراعاندى. KAZINFORM - بۇگىن ساعات 10:00 شاماسىندا رەسپۋبليكالىق ماڭىزى بار «استانا - قاراعاندى - الماتى» اۆتوموبيل جولىنىڭ 1510 شاقىرىمىندا («قاراعاندى- بالقاش» ۋچاسكەسى، جۇمابەك اۋىلىنىڭ ماڭى) قايعىلى جول-كولىك وقيعاسى بولدى. جول اپاتىنان 7 ادام مەرت بولدى.

ءمالىم بولعانداي، Toyota Alphard ماركالى اۆتوكولىك جۇرگىزۋشىسى الماتىدان قاراعاندىعا قاراي قوزعالىپ كەلە جاتىپ، جولدان شىعىپ كەتىپ، كولىك جول جيەگىنە اۋدارىلعان.

«اپات سالدارىنان جۇرگىزۋشى مەن 6 جولاۋشى، ونىڭ ىشىندە ەكى بالا وقيعا ورنىندا كوز جۇمدى. 12 جاستاعى جولاۋشى مەديتسينالىق مەكەمەگە جەتكىزىلدى. اتالعان فاكتى بويىنشا قىلمىستىق ءىس قوزعالدى»، - دەلىنگەن قاراعاندى وبلىستىق پد حابارلاماسىندا.

«قازاۆتوجول» ۇلتتىق كومپانياسى تەكسەرىستەن كەيىن جول اپاتى تۋرالى پىكىر ءبىلدىردى.

«تەكسەرىس بارىسىندا جولدىڭ ۋچاسكەسى نورماتيۆتىك تالاپتارعا ساي ەكەنى انىقتالدى. I- ب تەحنيكالىق ساناتتاعى جولدىڭ ءار باعىتىندا ەكى قوزعالىس جولاعى بار، جولدىڭ ورتاسىندا قورشاۋ ورناتىلعان. جول جابىندىسى تەگىس، اسفالتبەتوننان جاسالعان. وسى ۋچاسكەدە كورىنۋ دەڭگەيى شەكتەلمەگەن، ءجۇرىس بولىگى تازا بولعان. جول بەلگىلەرى مەن قوزعالىستى ۇيىمداستىرۋ اكىمشىلىك پوليتسيا باسقارماسىمەن كەلىسىلگەن. وقيعا كەزىندە اۋا رايى بۇلتتى، قار تۇرىندەگى ازداعان جاۋىن-شاشىن بولعان»، - دەلىنگەن كومپانيا حابارلاماسىندا.

ەسكە سالا كەتەيىك، بۇعان دەيىن بيىل 22 مىڭ جول اپاتى تىركەلىپ، 2 مىڭ ادام قازا بولعانىن جازعان بولاتىنبىز.