اۋدان اكىمى «ASK Capital» ج ش س باستاماسىمەن قارا شاتقال تۋريستىك ايماعىندا اسپالى شىنى كوپىر سالىنىپ جاتقانىن ايتتى.
ونىڭ سوزىنشە، قازىر شاتقالدا تىرەك قادالارىنا ارنالعان 16 ارماتۋرالىق قاڭقا دايىندالعان. ەندى تەرەڭدىگى 25 مەتر بولاتىن 16 قادانى ورناتۋ ءۇشىن بۇرعىلاۋ جۇمىستارى جۇرگىزىلىپ جاتىر. كەلەسى كەزەڭدە تىرەكتەردڭ ورناتۋ، بەتونداۋ جانە كوپىر كونسترۋكسيالارىن مونتاجداۋ جوسپارلانعان. جوبانىڭ جالپى قۇنى - 1,5 ميلليارد تەڭگە.
- جوبا تولىق ىسكە قوسىلعان جاعدايدا جىلىنا 400- 600 مىڭ تۋريستى قابىلداۋ مۇمكىندىگى بولادى. اسپالى كوپىردىڭ قۇرىلىسىن 2026 -جىلدىڭ IV توقسانىندا، ال وعان ىرگەلەس وزگە نىسانداردىڭ قۇرىلىسىن 2027 -جىلدىڭ ءبىرىنشى جارتى جىلدىعىندا اياقتاۋ جوسپارلانىپ وتىر، - دەدى تاڭات ايداربەكوۆ.
ودان بولەك اۋدان اكىمى مۇندا «قارا شاتقال» ج ش س تۋريستىك ايماق قۇرۋ جوباسىن ىسكە اسىرىپ جاتقانىن اتاپ ءوتتى. قازىرگى ۋاقىتتا تۋريستىك نىسان اۋماعىندا تاماقتانۋ ورنى، فوتوالاڭ، اتكەنشەك جانە شاتقالدى تاماشالاۋعا ارنالعان ارنايى كورۋ الاڭدارى پايدالانۋعا بەرىلگەن. بۇگىنگە دەيىن جوباعا 300 ملن تەڭگە ينۆەستيتسيا سالىنسا، تۇبەيگەلى جوبانىڭ ينۆەستيتسيالىق كولەمى 1 ميلليارد تەڭگەگە جەتەدى.
ەسكە سالايىق، 2026 -جىلدىڭ باسىندا قارا شاتقالداعى اسپالى اينەك كوپىردىڭ جاڭا ەسكيزى تانىستىرىلدى.
170 مەترلىك اينەك كوپىردىڭ جوباسى 2024 -جىلى تانىستىرىلعان بولاتىن.
جوبا مەنەدجەرى ماناپ تاعايەۆتىڭ ايتۋىنشا، كوپىردە ءبىر مەزەتتە 3 مىڭ ادام جۇرە الاتىن بولادى. كوپىردىڭ نەگىزى بەرىك تريپلەكس اينەكتەن جاسالسا، ال بۇكىل كونسترۋكسياسى تولىقتاي جينالمالى بولادى. بارلىق ەلەمەنتتەر دايىن كۇيىندە قۇرىلىس ورنىنا جەتكىزىلىپ، دانەكەرلەۋ جۇمىستارىنسىز قۇراستىرىلادى.