قۋاندىق بيشىمبايەۆتىڭ تۋىس ىنىسىنە تاعىلعان ايىپ وزگەرۋى مۇمكىن

 استانا. KAZINFORM - ەكس-شەنەۋنىك قۋاندىق بيشىمبايەۆقا قاتىستى سوت وتىرىسىندا ونىڭ تۋىس ىنىسىنە تاعىلعان ايىپتى باسقا باپپەن قاراۋ ۇسىنىلدى.

«ايىپتاۋشى تاراپ ب. بايجانوۆتى ق ر قىلمىستىق كودەكستىڭ 434-بولىگى بويىنشا ايىپتاۋدان باس تارتادى. ب. بايجانوۆتى قىلمىستىق كودەكستىڭ 432-بابىندا كوزدەلگەن اسا اۋىر قىلمىستى الدىن الا ۋادە بەرمەي جاسىرىپ، قىلمىس جاسادى دەگەن ايىپپەن قىلمىستىق ءىستى قاراۋدى جالعاستىرۋدى سۇرايدى. قىلمىستى جاسىرۋ - سوت تورەلىگىنە قارسى تۇرۋدىڭ ءبىر ءتۇرى، بۇل قىلمىستى اشۋدى جانە كىنالىنى جاۋاپقا تارتۋدى قيىنداتادى. سوندىقتان ب. بايجانوۆقا قاتىستى ايىپتاۋدىڭ جاڭا تۇجىرىمىن قابىلداۋىڭىزدى سۇرايمىز»، - دەدى پروكۋرور ساياحات نۇربەكوۆ.

ءوز كەزەگىندە جابىرلەنۋشى تاراپ ءوتىنىشحاتتى قولدادى، ال ب. بايجانوۆتىڭ قورعاۋشىسى سۋديادان جاڭا ايىپتاۋ اكتىسىمەن تانىسۋعا ۋاقىت بەرۋدى سۇرادى. وسىعان بايلانىستى سۋديا ءۇزىلىس جاريالادى، جالعاسى 2-مامىرعا ساعات 10:00 گە بەلگىلەندى.

باقىتجان بايجانوۆقا (ق. بيشىمبايەۆتىڭ تۋىس ءىنىسى) قىلمىستى جاسىرىپ، دەر كەزىندە پوليتسياعا حابارلاماعانى ءۇشىن ايىپ تاعىلعان ەدى.

ايتا كەتسەك، بۇگىن ساعات 10:00 دە باستالۋى ءتيىس ەكس- شەنەۋنىك قۋاندىق بيشىمبايەۆقا قاتىستى سوت وتىرىسى تۇستەن كەيىنگە قالدىرىلعان ەدى. سۋديا ونىڭ سەبەبىن ءتۇسىندىردى.

ەسكە سالساق، قۋاندىق بيشىمبايەۆتىڭ ءىسى بويىنشا سوت وتىرىسى بۇعان دەيىن دە ۋاقىتشا توقتاتىلعان ەدى.

ق. بيشىمبايەۆتىڭ ءىسى بويىنشا سوت تەرگەۋى 24-ساۋىردە اياقتالدى، ەندى باس سوت وتىرىسى وتەدى.

قۋاندىق بيشىمبايەۆتىڭ ءىسى بويىنشا ونلاين- كورسەتىلىم رەيتينگى كەيبىر سەريالداردان اسىپ ءتۇستى. جوعارعى سوتتىڭ كوممۋنيكاتسيا ءبولىمى حابارلاعانداي، سوت پروتسەسىنە قوعام جوعارى قىزىعۋشىلىق تانىتىپ وتىر.