قۋاندىق بيشىمبايەۆتىڭ جازاسىن جەڭىلدەتۋگە 100 ميلليون تەڭگە دامەتكەن الاياق سوتتالدى

استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ قاتىسۋىمەن الاياقتىق جاساۋعا وقتالدى جانە اسا ءىرى مولشەردە پارا بەرۋگە يتەرمەلەدى دەپ ايىپتالعان گ. ەسىمدى ەلوردا تۇرعىنىنا قاتىستى ۇكىم شىعاردى.

سوتتىڭ حابارلاۋىنشا، استانالىق الاياق بيىل مامىردا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ايەلىن اياۋسىزدىقپەن ءولتىردى دەپ ايىپتالىپ، سوتتالىپ جاتقان كەزدە ەكس-شەنەۋنىككە قاتىستى ۇكىمدى جەڭىلدەتۋ جانە اپەللياتسيالىق ساتىعا بەرۋ ءۇشىن ودان 100 ميلليون تەڭگە كولەمىندە سىياقى سۇراپ، ارتىنان يەمدەنگەن.

«سوتتالۋشىنىڭ كىناسى كۋاگەرلەردىڭ ايعاقتارىمەن، ساراپتامالاردىڭ قورىتىندىلارىمەن، جاسىرىن تەرگەۋ ارەكەتتەرىنىڭ ناتيجەلەرىمەن، بەينەجازبامەن جانە قىلمىستىق ءىس بويىنشا باسقا دا ماتەريالدارمەن دالەلدەندى»، - دەلىنگەن ۇكىمدە.

دەگەنمەن سوتتالۋشى كىناسىن مويىنداماعان، ال ونىڭ قورعاۋشىسى سوتتالۋشىنى اقتاۋدى سۇراعان.

«اۋىرلاتاتىن ءمان-جاي انىقتالعان جوق. سوت ۇكىمىمەن القابيلەر سوتىمەن گ. ق ك 24-بابىنىڭ 3-بولىگى - 190-بابى 4-بولىگىنىڭ 2) تارماعى، 28-بابىنىڭ 4-بولىگى - 367-بابىنىڭ 4-بولىگىندە كوزدەلگەن قىلمىستىق قۇقىق بۇزۋشىلىقتار جاساعانى ءۇشىن كىنالى دەپ تانىلىپ، قىلمىستار جيىنتىعى بويىنشا (ق ك- ءنىڭ 58-بابى) 10 جىلعا باس بوستاندىعىنان ايىرۋعا سوتتالدى»، - دەپ جازىلعان سوت ۇكىمىندە.

سوت ۇكىمى زاڭدى كۇشىنە ەنگەن جوق.

ەسكە سالا كەتسەك، قۋاندىق بيشىمبايەۆتىڭ جازاسىن جەڭىلدەتۋگە ۋادە ەتكەن استانا تۇرعىنىنا قاتىستى تەرگەۋ بيىل تامىزدا اياقتالعان ەدى.