قۋاندىق بيشىمبايەۆ تۇرمەدە ءالى جۇمىسسىز وتىر

استانا. قازاقپارات - 24 جىلعا قامالعان ەكس-شەنەۋنىك قۋاندىق بيشىمبايەۆقا تۇرمەدە ءالى جۇمىس تابىلماعان. بۇل تۋرالى KursivMedia حابارلايدى.

ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى ءتوراعاسىنىڭ ورىنباسارى جانىبەك بايماعانبەتوۆتىڭ مالىمدەۋىنشە، بۇرىنعى مينيستر قۋاندىق بيشىمبايەۆ جازاسىن وتەپ جاتقان مەكەمەدە قازىر قۇرىلىس جۇمىستارى ءجۇرىپ جاتىر.

- مەكەمەدە قۇرىلىس جۇمىستارى ءجۇرىپ جاتىر. بيزنەس ايماق جۇمىسشىلارمەن تولىق قامتىلعان. ول جەردە قوسىمشا تسەحتار اشىلۋى كەرەك، سول كەزدە جاڭا جۇمىس ورىندارى پايدا بولادى. سول كەزدە مەكەمەدەگى بارلىق سوتتالعاندى جۇمىسپەن قامتيمىز. قازىر سوتتالعانداردىڭ 60 پايىزى جۇمىسپەن قامتىلعان. بۇل كورسەتكىشتى 100 پايىزعا جەتكىزۋدى جوسپارلاپ وتىرمىز. سوتتالعانداردى تاڭداپ جۇمىسقا ورنالاستىرمايمىز، - دەيدى جانىبەك بايماعانبەتوۆ.

ەسكە سالساق، ەكس-شەنەۋنىك قۋاندىق بيشىمبايەۆتىڭ جازانى وتەۋ مەكەمەسىندە جۇمىسقا تۇرماعانى تۋرالى بىلتىر كۇزدە حابارلاعان ەدىك.

ايتا كەتەيىك، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتى ايەلىن ازاپتاپ، ولتىرگەنى ءۇشىن كىنالى دەپ تاپتى. ول 24 جىلعا باس بوستاندىعىنان ايىرىلدى.