قانداي قىزمەتكەرلەرگە قوسىمشا جاردەماقى مەن ۇستەمەاقى تولەنەدى

ازاماتتىق قورعاۋ ورگاندارىندا كۇشەيتىلگەن جۇمىس تارتىبىندە قىزمەت ەتكەن ماماندارعا ۇستەمەاقى تولەنەدى.

بۇل تۋرالى ماجىلىستە ازاماتتىق قورعاۋعا قاتىستى زاڭ جوباسىن تانىستىرۋ كەزىندە توتەنشە جاعدايلار ۆيتسە-ءمينيسترى باۋىرجان سىزدىقوۆ ايتتى، دەپ حابارلايدى Kazinform.

زاڭ جوباسى ۇكىمەتتىڭ 2023-جىلعا ارنالعان زاڭ جوبالاۋ جۇمىستارىنىڭ جوسپارىنا سايكەس ازىرلەندى. جوبا مەملەكەت باسشىسىنىڭ تاپسىرمالارىن ىسكە اسىرۋعا، سونداي-اق ازاماتتىق قورعاۋ سالاسىنداعى قاۋىپسىزدىكتى قامتاماسىز ەتۋ جونىندەگى شارالاردى كۇشەيتۋگە باعىتتالعان. زاڭ جوباسىندا 4 كودەكسكە جانە 17 زاڭعا تۇزەتۋ ەنگىزۋ ەسكەرىلگەن.

«ازاماتتىق قورعاۋ ورگاندارى قىزمەتكەرلەرىنىڭ الەۋمەتتىك جاعدايىن جاقسارتۋ قاراستىرىلعان. ونىڭ ىشىندە باسقا جەرگە كوشۋگە بايلانىستى قىزمەتكەرلەردى اۋىستىرۋ جانە قىزمەت بابىندا ىلگەرىلەتۋ كەزىندە كوتەرمە جاردەماقىلار تولەۋدى جۇزەگە اسىرۋ، ءوز مۇلكىن تاسىمالداعانى ءۇشىن شىعىنداردى وتەۋ، جاۋىنگەرلىك ءىس-قيمىلدارعا ۇقساس جاعدايلارداعى جۇمىسى ءۇشىن ۇستەمەاقى تولەۋ ەسكەرىلگەن. جاۋىنگەرلىك ءىس-قيمىلدارعا توقتالساق، بىزدە جۇمىستىڭ كۇشەيتىلگەن ءتارتىبى ەنگىزىلىپ جاتادى. سول كەزدە ماماندار تاۋلىك بويى قىزمەتىندە بولادى. وسىنداي جاعدايلاردا ۇستەماقى تولەنەدى»، - دەدى ب. سىزدىقوۆ.

سونىمەن قاتار، قۇجات اياسىندا ادامدار كوپ جينالاتىن نىسانداردى جانە بيىكتىگى 28 مەتردەن اساتىن عيماراتتاردى پايدالانۋعا قابىلداۋ بويىنشا توتەنشە جاعدايلار مينيسترلىگىنە بۇرىنعى قۇزىرەتىن قايتارۋ ۇسىنىلعان. بۇل رەتتە ءورت سالاسىنداعى باقىلاۋ نازارعا الىنادى.

«ونەركاسىپتىك قاۋىپسىزدىكتى قامتاماسىز ەتۋگە ەرەكشە ءمان بەرىلگەن. وندىرىستىك جاعىنان قاۋىپتى نىساندارداعى تەحنيكالىق ديرەكتوردان بولەك باسقا دا باسشىلاردىڭ توتەنشە جاعدايلار مينيسترلىگىندە ەمتيحان تاپسىرۋىن ۇسىنىپ وتىرمىز. نەگە؟ سەبەبى تەحنيكالىق باعىتتاعى باسشىسى ەڭبەك دەمالىسىنا، ءىسساپارعا كەتكەن كەزدە، ونىڭ مىندەتتەرىن باسقا باسشىلار اتقارادى. سوندىقتان بارشا باسشىلىق قۇرام قاۋىپسىزدىك جاعدايىنا ءجىتى نازار اۋدارۋى ءۇشىن ءبىلىمىن جەتىلدىرىپ، ەمتيحان تاپسىرۋى ءتيىس. اتاپ ايتقاندا، جىل سايىن قاۋىپتى وندىرىستىك نىساندارداعى تەحنيكالىق جابدىقتار ەسكىرىپ جاتىر جانە ونى اۋىستىرۋدا كەمشىلىكتەر بارشىلىق. بۇل تۇرعىدا، قۇرالداردى جاڭارتۋ مەن تەحنيكالىق قايتا جاراقتاندىرۋدىڭ جيىنتىق جوسپارىن توتەنشە جاعدايلار مينيسترلىگىمەن كەلىسۋ مىندەتىن ەنگىزىپ وتىرمىز»، - دەدى ۆيتسە-مينيستر.

بۇدان بولەك، قۇجاتتا تۋريستەردىڭ، ەكسكۋرسانتتاردىڭ، تۋريستىك قىزمەتتى جۇزەگە اسىراتىن ادامداردىڭ، ەلىمىز اۋماعىندا تۇراقتى تۇراتىن ازاماتتار مەن ادامداردىڭ تجم اۋماقتىق ورگاندارىن الداعى ءجۇرىپ-تۇرۋ مارشرۋتتارى تۋرالى حاباردار ەتۋى جونىندەگى مىندەتتەرىن ەنگىزۋ ۇسىنىلدى.

«ەلىمىزگە كەلگەن تۋريستەر تاۋلى جەرلەرگە بارعان كەزدە، جوعالىپ جاتادى. سوندىقتان تۋريستىك مەكەمەلەر توتەنشە جاعدايلار مينيسترلىگىنىڭ اۋماقتىق بولىمشەلەرىنە ولاردىڭ جۇرەتىن جولدارى مەن باعدارى جايىندا مالىمەت بەرۋى كەرەك. زاڭ كۇشىنە ەنسە، تۋريستەر وزىمەن بىرگەن GPS ترەكەر الىپ ءجۇرۋى كەرەك. بۇل ءوز كەزەگىندە تاۋعا شىققان ادامداردى تەز ارادا قۇتقارۋعا مۇمكىندىك بەرەدى»، - دەدى باۋىرجان سىزدىقوۆ.

سونىمەن قاتار، سەيسميكالىق قاۋىپسىزدىكتى قامتاماسىز ەتۋ جونىندەگى نورمالاردى بەلگىلەۋگە، ونىڭ ىشىندە سەيسميكالىق قاۋىپتىلىك پەن تاۋەكەلدى باعالاۋعا، جەر سىلكىنىسىنەن قورعاۋ جونىندەگى ءىس-شارالاردى بەلگىلەۋگە ازاماتتىق قورعاۋ سالاسىنداعى ۋاكىلەتتى ورگانعا سەيسميكالىق قاۋىپسىزدىكتى قامتاماسىز ەتۋ جونىندەگى قۇزىرەتتى بەرۋ قاراستىرىلعان.