قانداي جاعدايدا ەرلى-زايىپتىنىڭ مۇلىگى بولىسكە تۇسپەيدى؟

استانا. KAZINFORM - ەلىمىزدە جىل سايىن اجىراساتىن ەرلى-زايىپتىلار كوبەيىپ كەلەدى. ادەتتە اجىراسۋ كەزىندە ەرلى-زايىپتىنىڭ ورتاق مۇلىگى بولىسكە تۇسەدى، دەگەنمەن مۇلىك بولىنبەيتىن جاعدايلار دا كەزدەسەدى. ول قانداي جاعداي؟

Massaget.kz ءتىلشىسى ادۆوكات البينا باحتيار قىزىنان سۇرادى.

ەرلى-زايىپتىلاردىڭ مۇلىكتەرىن ءبولۋ ماسەلەسى قازاقستان رەسپۋبليكاسىنىڭ نەكە (ەرلى-زايىپتىلىق) جانە وتباسى تۋرالى كودەكسىمەن رەتتەلەدى.

البينا باحتيار قىزى مۇلىك بولىسكە تۇسپەيتىن جاعدايلاردىڭ ءتىزىمىن جاسادى:

1. نەكەگە دەيىن الىنعان مۇلىك. ەگەر ەرلى- زايىپتىنىڭ ءبىرى مۇلىكتى نەكەگە تۇرعانعا دەيىن ساتىپ العان بولسا، ول جەكەمەنشىگى بولىپ سانالادى جانە بولىسكە تۇسپەيدى.

2. سىيلىق نەمەسە مۇراگەرلىك ارقىلى الىنعان مۇلىك. نەكە كەزىندە سىيلىققا الىنعان نەمەسە مۇراگەرلىكپەن وتكەن مۇلىك تەك ونى العان تۇلعانىڭ جەكەمەنشىگى بولادى.

3. جەكە پايدالانۋعا ارنالعان مۇلىك. مىسالى، كيىم-كەشەك، جەكە زاتتار، اشەكەي بۇيىمدار (قىمبات باعالى بولسا دا) بولىسكە جاتپايدى.

4. بالالارعا ارنالعان مۇلىك. بالالارعا ارنالعان زاتتار نەمەسە ولاردىڭ اتىنا جازىلعان مۇلىك (مىسالى، شوتتار نەمەسە پاتەر) تە بولىسكە تۇسپەيدى.

5. نەكەلىك شارت (كونتراكت). ەگەر ەرلى-زايىپتىلار اراسىندا نەكەلىك شارت جاسالعان بولسا، وندا مۇلىكتى ءبولۋ شارت بويىنشا جۇرگىزىلەدى. نەكەلىك شارتتا مۇلىكتى ءبولىسۋ ءتارتىبى انىق كورسەتىلۋى مۇمكىن، سوعان سايكەس كەيبىر مۇلىك بولىسكە تۇسپەيدى.

«ەگەر اتالعان جاعدايلار بولماسا جانە نەكەلىك شارت جاسالماسا، جالپى ەرەجە بويىنشا نەكە كەزىندە الىنعان بارلىق مۇلىك ورتاق مەنشىك بولىپ سانالادى جانە بولىسكە تۇسەدى»، - دەدى ادۆوكات.

ەسكە سالايىق، بۇعان دەيىن اجىراسۋ كەزىندە جىلجىمايتىن مۇلىك قانداي جاعدايدا بولىسكە سالىنبايتىنى حابارلانعان بولاتىن.