قانداي جاعدايدا مۇعالىمدەردى سەنبىلىككە شىعارۋعا بولادى - مينيستر
استانا. KAZINFORM - وقۋ-اعارتۋ ءمينيسترى عاني بەيسەمبايەۆ پەداگوگ مارتەبەسى مەن قۇقىقتارىن قورعاۋ شارالارى تۋرالى پىكىر ءبىلدىردى.
ءمينيستردىڭ ايتۋىنشا، 2019-جىلمەن سالىستىرعاندا مۇعالىمدەردى ارتىق جۇمىسقا تارتۋ بويىنشا كوپتەگەن كەمشىلىك ازايعانى بايقالادى.
«بىلتىر سەنبىلىككە شىعارۋ ماسەلەسى تۋرالى مۇعالىمدەر كوپ شاعىمداندى. بۇل مەكتەپ اۋلاسى بولسا، باسقا اڭگىمە، ويتكەنى بالالاردى ەڭبەككە باۋلۋىمىز كەرەك، ونى مۇعالىمدەر جەكە ءوزى ۇلگى ەتىپ كورسەتۋى كەرەك. بايقاساڭىزدار مەن دە مەكتەپ اۋلاسىنا اعاش ەگەمىن، بۇل وتە ۇلگىلى نارسە. ءبىراق مەكتەپتەن تىس، مەكتەپكە قاتىسى جوق جەرلەرگە تارتۋ - مۇعالىمدى نەگىزگى فۋنكتسياسىنان الاڭداتادى. ءمۇعالىمنىڭ باستى مىندەتى - بالالارعا ساپالى ءبىلىم مەن سانالى تاريبە بەرۋ، ودان باسقاسىنا الاڭداتا بەرۋدىڭ قاجەتى جوق»، - دەدى وقۋ-اعارتۋ ءمينيسترى عاني بەيسەمبايەۆ ءماجىلىس كۋلۋارىندا.
ايتا كەتەيىك، «پەداگوگ مارتەبەسى تۋرالى» زاڭ قابىلدانعانىنا 5 جىلعا جۋىقتادى. بۇعان دەيىن Kazinform اگەنتتىگى اۋقىمدى رەفورما اسەرى تۋرالى ارنايى شولۋ ازىرلەگەن ەدى.