قانداسىمىز ەركەبۇلان بايىت ۇلى الەمدىك ارەنادا ەكى بىردەي جۇلدەنى جەڭىپ الدى - شەتەلدەگى قازاق باسپا ءسوزى
Kazinform حالىقارالىق اقپارات اگەنتتىگى شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
شينجاڭداعى مەكتەپتەردە وزگەشە وقۋ ءتاسىلى جولعا قويىلدى - CNR
شينجاڭنىڭ وقۋ-اعارتۋ سالاسىنداعى دەنە تاربيەسى پانىندەگى ساباق مازمۇنى كەڭەيتىلۋ ۇستىندە. اتالعان ولكەدە دەنە تاربيەسى ساباعىنىڭ وقىتۋ فورماسى ءار وڭىردە وزگە جەرلەرمەن سالىستىرعاندا وزىندىك ەرەكشەلىككە يە، - دەپ حابارلايدى قىتايدىڭ «ورتالىق حالىق راديوسى» اقپاراتتىق پورتالى.
اتاپ ايتقاندا، التايداعى ورتا، باستاۋىش مەكتەپ وقۋشىلارىنىڭ قىسقى دەنە تاربيەسى ساباعى شاڭعى الاڭىندا وتەدى. سونىمەن قاتار 2019 -جىلدان باستاپ التاي قالاسى «ات ونەرىن مەكتەپ اۋلاسىنا ەنگىزۋ» جوباسىن جالپىلاستىرىپ، ساۋاتتىق بىلىمدەرىن ۇيرەتىپ، وقۋشىلاردى اتقا مىنگىزۋ ارقىلى اتالعان ونەردىڭ وزگەشە قاسيەتىن سەزىندىرگەن. ال، قارامايلى قالالىق №8-باستاۋىش مەكتەپ دەنە تاربيەسى ساباعىندا «قالقىمالى تارەلكە ۇشىرۋ» دەپ اتالاتىن سپورتتىق ساباعىن جالعاستىرۋدا.
قىتايلىق ب ا ق-تىڭ دەرەگىنشە، قازىرگى ۋاقىتتا شينجاڭدا جوعارىداعى اتالعان دەنە تاربيەسى ساباعىنان تىس، وزگەشە ەرەكشەلىككە يە ساباق تۇرلەرى جۇرگىزىلىپ جاتىر.
اتاپ ايتار بولساق، جاقىندا شىحىزى ۋنيۆەرسيتەتىندە ءجۇزىم شارابىن ساراپتاۋ ساباعى وتكەن. بۇل ساباق جەلى قولدانۋشىلارىنىڭ قىزۋ تالقىسىنا ءتۇستى. سونداي-اق شىحىزى ۋنيۆەرسيتەتى ازىق-تۇلىك كوللەدجىنىڭ تاجىريبە ساباعىندا شاكىرتتەر سيىر ەتى بۇقتىرماسىن جاساۋدى ۇيرەنىپ، ساباق بارىسىندا ءدامدى تاعامنان ءدام تاتۋمەن بىرگە ازىق-تۇلىك بىلىمدەرىن قوسا يگەرگەن.
«CNR»-دىڭ مالىمەتىنشە، قازىرگە دەيىن ورتا، باستاۋىش مەكتەپتەردە شاڭعى تەبۋ، ات ونەرى ساباعى جالپىلاستىرىلسا، ەندى شينجاڭ پەداگوگيكا ۋنيۆەرسيتەتى ستۋدەنتتەرگە ساداق اتۋ ونەرىن ۇيرەتۋ ساباعىن ەنگىزە باستاعان.
وزبەكستان بيىل 198 ەلمەن ساۋدا بايلانىسىن جاسادى - «ءوز ا»
2023 -جىلدىڭ قاڭتار-قازان ايلارىندا وزبەكستان الەمنىڭ 198 ەلىمەن ساۋدا بايلانىسىن جاسادى. وسى ارلىقتا وزبەكستان رەسپۋبليكاسىنىڭ سىرتقى ساۋدا اينالىمى 51 ميلليارد ا ق ش دوللارىنا جەتتى. بۇل تۋرالى وسى اپتادا وزبەكستاندىق «ءوز ا» اقپاراتتىق اگەنتتىگى جازدى.
اتالعان باسىلىمنىڭ مالىمەتىنشە، وتكەن جىلدىڭ سايكەس كەزەڭىمەن سالىستىرعاندا سىرتقى ساۋدا اينالىمىنىڭ كولەمى 25,2 پايىزعا وسكەن. وزبەكستان سىرتقى ساۋدا اينالىمىندا قازاقستان بايلانىسى ەداۋىر جوعارى ءۇش ەلدىڭ ءبىرى. اتاپ ايتار بولساق، قىتاي (21,2 پايىز)، رەسەي (15,6 پايىز)، قازاقستان (7 پايىز).
ەركەبۇلان بايىت ۇلى الەمدىك ارەنادا ەكى بىردەي جۇلدە جەڭىپ الدى - facebook
62 ەلدىڭ ۇزدىك سپورتشىلارى قاتىسقان استانادا وتكەن چەمپيوناتتا Mr.olimpia amateur qualifier. Astana IFBB PRO 2023 سايىسىندا (Mensphysique Novice كاتەگورياسىندا) التىن مەدالدى موڭعوليا ەلىندە تۇراتىن ەركەبۇلان بايىت ۇلى اتتى سپورتشى قانداسىمىز جەڭىپ الدى. سونىمەن قاتار وسى سپورتتىڭ Mensphysique Open Class D تۇرىنەن قولا مەدالدى تاعى قانجىعاسىنا بايلاعان. بۇل تۋرالى ۇزدىك سپورتشىنىڭ موڭعوليادا تۇراتىن اكەسى اقىن بايىت قابان ۇلى facebook-تەگى پاراقشاسىندا جازدى.
جازبا اۆتورى بۇل استانا قالاسىندا بولىپ جاتقان الەمدىك دەڭگەيدەگى اسا بەدەلدى سپورتتىق شارا ەكەنىن ايتادى.
اقىن بايىت قابان ۇلى بالاسىنىڭ استاناعا بارعاندا الدىنان كۇتىپ الىپ، ۇيىنە جاتقىزىپ، بارلىق جاعدايىن جاساعان ۇلاربەك دالەي ۇلىنا جانە ونىڭ وتباسىنا ريزاشىلىعىن بىلدىرگەن.
130 ميلليون جىل بۇرىن ءومىر سۇرگەن دينوزاۆر تەرىسىنىڭ كەي بولىگى 100 پايىز ساقتالعان - «حالىق گازەتى»
قىتاي عالىمدارى 130 ميلليون جىل بۇرىن ءومىر سۇرگەن دينوزاۆر تەرىسىنىڭ قالدىقتارىن تاپتى، دەپ حابارلايدى قىتايدىڭ «حالىق» گازەتى اقپاراتتىق پورتالى.
اتالعان ب ا ق-تىڭ كەلىتىرگەن مالىمەتتەرىنە سۇيەنسەك، جاقىندا قىتايدىڭ شاندۋڭ ولكەسىندەگى عالىمداردىڭ زەرتتەۋ توبى 130 ميلليون جىل بۇرىنعى حىبي ولكەسىنىڭ چەندە قالاسى فەننين مانجۋر اۆتونوميالىق اۋدانىندا تابىلعان Jehol Biota ءشوپ قورەكتى دينوزاۆرلاردىڭ ەكى قازباسىن قازىپ، قالپىنا كەلتىردى.
«حالىق» گازەتىنىڭ دەرەگىنشە، سۇيەكتەر مەن تەرى قالدىقتارىنىڭ كەيبىر بولىگى شامامەن 100 پايىز ساقتالعان. زەرتتەۋ توبى قازبانىڭ نەگىزگى بولىگىن قالپىنا كەلتىرۋدى اياقتاپ، كەزەڭدىك ناتيجەلەرگە قول جەتكىزگەن.
مەن ارمانداعان قازاقستان - «Parstoday»
وسى اپتادا يراننىڭ «Parstoday» اقپارات اگەنتتىگىندە «مەن ارمانداعان قازاقستان» دەگەن تاقىرىپتاعى ماقالا جارىق كورگەن.
اتالعان ماقالانىڭ اۆتورى ءال-فارابي اتىنداعى قازاق ۇلتتىق ۋنيۆەرسيتەتىنىڭ دايىندىق فاكۋلتەتىندە ءبىلىم الىپ جۇرگەن ستۋدەنت.
فاكۋلتەت تۇلەگى موڭعوليا ەلىنەن كەلگەن ەكەن. اۆتوردىڭ ايتۋىنشا، ول موڭعولياداعى بارلىق جوعارعى وقۋ ورىندارىن ۇزاق ساراپتاعان، ءبىراق تاڭداۋى اتالعان ەلدەن ەمەس، نازارى اتامەكەنى ق ر- داعى ءال-فارابي اتىنداعى قازاق ۇلتتىق ۋنيۆەرسيتەتىنە توقتاعان.
«قازىرگى ءال-فارابي اتىنداعى قازاق ۇلتتىق ۋنيۆەرسيتەتىنە ءتۇسۋ ءاربىر تۇلەكتىڭ ارمانى بولعانى انىق. سەبەبى ول الدىڭعى قاتارلى وقۋ ورىنداردىڭ ءبىرى دە بىرەگەيى. بيىل وقۋعا گرانت ارقىلى ءتۇسۋدى ماقسات ەتىپ جۇرگەن جاس تىڭداۋشىلاردىڭ ءبىرىمىن. قازىرگى تاڭدا قازاق ۇلتتىق ۋنيۆەرسيتەتىنىڭ دايىندىق فاكۋلتەتىندە ءبىلىم الىپ ءجۇرمىن»، - دەپ جازدى دايىندىق فاكۋلتەتىنىڭ تۇلەگى.
تاكلاماكان شولىندەگى قۇمدار توپىراققا اينالاتىن بولدى - «People.cn»
جاقىندا شينجاڭداعى تاكلاماكان ءشولىنىڭ كىندىگىندەگى چەرشەن اۋدانىنداعى «قۇمدى توپىراققا اينالدىرۋ» ەكسپەريمەنتتىك دەمونستراتسيالىق جوباسى اياسىندا 4 ايلىق جۇمىستان كەيىن ءبورىقۇيرىق ءشوبىن سىناق رەتىندە وتىرعىزۋ ءساتتى باستالدى. بۇل باستاما «قۇمدى توپىراققا اينالدىرۋ» ەكولوگيالىق قالپىنا كەلتىرۋ تەحنولوگياسىن ەنگىزۋگە بەرىك نەگىز قالادى، دەپ جازادى kaz.people.cn.
قىتايلىق باسىلىمنىڭ مالىمەتىنشە، قۇمدى شولگە وتىرعىزىلعان ءبورىقۇيرىق ءشوبى كۇن ۇزاق تۇسەتىن ورتاعا وسۋگە بەيىم. ول ايازعا، ىلعالعا وتە ءتوزىمدى بولعاندىقتان مالدىڭ جەم-ءشوبى، قۇمدى تىزگىندەيتىن وسىمدىك رەتىندە پايدالانۋعا بولادى. قۇممەن كۇرەسۋدە جانە قورشاعان ورتانى قالپىنا كەلتىرۋدە ءبورىقۇيرىق شوپتەرىنىڭ ينتەگراتسيالانعان مۇمكىندىكتەرىن تولىق پايدالانۋدى جالعاستىرادى جانە چەرشەن اۋدانىنداعى قۇمدى ءشولدىڭ توپىراققا اينالۋىنا جاڭا جول تاباتىن كورىنەدى.
ايتا كەتەيىك، تاكلاماكان ءشولى - باتىس قىتايدا ورنالاسقان ءشولدى دالا. الەمدەگى ەڭ ۇلكەن ءارى ەڭ ۇزىن شولدەردىڭ ءبىرى. باتىستان شىعىسقا دەيىنگى ارالىعى 1000 ك م. ەنى - 400 ك م. جالپى قۇمنىڭ اۋدانى - 300 مىڭ ك م² قۇرايدى.
جالپى، تاكلاماكان ءشولى الەمدە ساحارا شولىنەن كەيىنگى 2-ورىندا تۇرعان قۇمدى دالا.
يلبەر ورتايلىعا ە ۇ ۋ ۋنيۆەرسيتىنىڭ قۇرمەتتى پروفەسورى اتاعى بەرىلدى - «TRT»
قازاقستاننىڭ باس قالاسى استانادا «تۇركيا رەسپۋبليكاسىنىڭ 100 جىلدىق بەلەسىنەن تۇركى الەمىنىڭ بولاشاعىنا» تاقىرىبىندا حالىقارالىق كونفەرەنسيا وتكىزىلدى. بۇل تۋرالى تۇركيا راديو تەليەۆيزيا پورتالى حابارلادى.
اتالعان باسىلىمنىڭ دەرەگىنشە، تۇركى اكادەمياسى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە تۇركيا رەسپۋبليكاسىنىڭ ەلشىلىگىمەن بىرلەسىپ ۇيىمداستىرعان شارانىڭ اشىلۋىندا تۇركى اكادەمياسىنىڭ پرەزيدەنتى شاھين مۇستافايەۆ، تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى مۇستافا كاپۋدجۋ، حالىقارالىق وسمانلى زەرتتەۋلەرى كوميتەتىنىڭ باسقارما كەڭەسىنىڭ مۇشەسى پروفەسسور يلبەر ورتايلى ءسوز سويلەگەن.
جيىن اياسىندا تۇركى اكادەمياسى بەلگىلى تۇرىك تاريحشىسى افەت يناننىڭ «كەمال اتاتۇرىكتى ەسكە العاندا» اتتى كىتابىنىڭ تۇساۋكەسەر ءراسىمى ءوتتى.
جاڭا كىتاپتا تۇرىك زيالى قاۋىمىنىڭ كورنەكتى وكىلى افەت ينان حانىمنىڭ تۇركى الەمىنىڭ ۇلى قايراتكەرى، تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرىك تۋرالى ەستەلىكتەرى مەن ويلارى جيناقتالعان.
كونفەرەنسيا سوڭىندا پروفەسسور يلبەر ورتايلىعا تۇركى الەمىنىڭ ىنتىماقتاستىعىن ارتتىرۋداعى ۇلەسى ءۇشىن تۇركى اكادەمياسىنىڭ ارنايى مەدالى تابىستالىپ، ل. ن. گۋميلەۆ اتىنداعى ە ۇ ۋ ۋنيۆەرسيتىنىڭ قۇرمەتتى پروفەسورى اتاعى بەرىلدى.
اۆتور
بەيسەن سۇلتان ۇلى