قانداستاردى قابىلداۋدىڭ 2025 - جىلعا ارنالعان وڭىرلىك كۆوتاسى بەكىتىلدى
استانا. KAZINFORM - قانداستار مەن قونىس اۋدارۋشىلاردى قابىلداۋدىڭ بيىلعى وڭىرلىك كۆوتاسى بەكىتىلدى، دەپ حابارلايدى ەڭبەك مينىستىرلىگى.
- ق ر ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن قانداستار مەن قونىس اۋدارۋشىلاردى قابىلداۋدىڭ 2025 - جىلعا ارنالعان وڭىرلىك كۆوتاسى 9653 ادام دەپ بەلگىلەندى، بۇل بىلتىرعى جىلمەن سالىستىرعاندا 170 ادامعا ارتىق. بۇيرىقتىڭ ماقساتى قازاقستان رەسپۋبليكاسى ۇكىمەتى ايقىندايتىن وڭىرلەردە قانداستار مەن قونىس اۋدارۋشىلاردى وڭتايلى قونىستاندىرۋ، - دەلىنگەن حابارلامادا.
2025 -جىلى وڭىرلىك كۆوتا وبلىستار بويىنشا تومەندەگىدەي ءبولىندى:
— قانداستار ءۇشىن: پاۆلودار وبلىسى — 1056 ادام، اقمولا وبلىسى - 285 ادام، شىعىس قازاقستان وبلىسى - 269 ادام، اباي وبلىسى - 244 ادام، سولتۇستىك قازاقستان وبلىسى - 175 ادام، قوستاناي وبلىسى - 150 ادام، اتىراۋ وبلىسى - 100 ادام، باتىس قازاقستان وبلىسى - 30 ادام؛
- قونىس اۋدارۋشىلار ءۇشىن: پاۆلودار وبلىسى - 3050 ادام، سولتۇستىك قازاقستان وبلىسى - 2969 ادام، قوستاناي وبلىسى - 535 ادام، شىعىس قازاقستان وبلىسى - 372 ادام، اباي وبلىسى - 255 ادام، ۇلىتاۋ وبلىسى - 125 ادام، قاراعاندى وبلىسى - 38 ادام.
قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزىلگەن ادامدارعا مەملەكەتتىك قولداۋ شاراسى كورسەتىلەتىن بولادى، اتاپ ايتقاندا:
- كوشۋگە سۋبسيديالار - وتباسىنىڭ ءاربىر مۇشەسىنە 70 ا ە ك بويىنشا ءبىرجولعى تولەم؛
- 12 اي ىشىندە ءبىر وتباسىنا 15 تەن 30 ا ە ك- كە دەيىن تولەنەتىن تۇرعىن ءۇيدى جالداۋ (جالعا الۋ) جانە كوممۋنالدىق قىزمەتتەرگە اقى تولەۋ بويىنشا شىعىستاردى جابۋ ءۇشىن سۋبسيديالار؛
- 400 ا ە ك مولشەرىندە قونىس اۋدارۋعا جاردەم كورسەتەتىن جۇمىس بەرۋشىلەر ءۇشىن سۋبسيديالار؛
- قىسقا مەرزىمدى كاسىپتىك وقىتۋعا جولداما؛
- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ؛
- تۇرعىن ءۇي ساتىپ الۋعا ەكونوميكالىق موبيلدىلىك سەرتيفيكاتتارىن بەرۋ.
ەستەرىڭىزگە سالا كەتەيىك، 2024 -جىلى 19,7 مىڭنان استام ەتنيكالىق قازاق تاريحي وتانىمەن تابىسىپ، قانداس مارتەبەسىن الدى.
1991-جىلدان باستاپ 2025 -جىلعى 1 قاڭتار ارالىعىندا 1 ميلليون 148 مىڭ استام ەتنيكالىق قازاق تاريحي وتانىنا ورالدى.