قانداس مارتەبەسىن بەرۋ ءتارتىبى جەتىلدىرىلەدى

استانا. قازاقپارات- ەندى «قانداس» مارتەبەسىن الۋ ءۇشىن ءوتىنىش بىلدىرگەن ادامداردىڭ ۇلتى قازاق ەكەنىن انىقتاۋ ءتارتىبى جەرگىلىكتى اتقارۋشى ورگانداردىڭ قۇزىرەتىنە كىرەدى.

ءماجىلىس حالىقتىڭ كوشى-قونى جانە قىلمىستىق-اتقارۋ جۇيەسى سالاسىنداعى زاڭنامانى جەتىلدىرۋ جوباسىن ەكىنشى وقىلىمدا قابىلدادى.

سونىمەن قاتار ەڭبەك ميگرانتتارىنا ءبىر ايدان، 12 ايعا دەيىنگى كەز كەلگەن مەرزىمگە جۇمىسقا رۇقسات الۋ مۇمكىندىگى بەرىلەدى. ەلدە ازاماتتىق الۋ ءۇشىن قويىلاتىن تالاپتار كۇشەيتىلەدى. ءوتىنىش بەرۋشى ەندى مەملەكەتتىك ءتىلدى، اتا زاڭدى جانە قازاقستان تاريحىن ءبىلۋى ءتيىس. ال قازاقستاندىقتاردىڭ جەسىرلەرى تۇرعىلىقتى مەرزىمىنە قاراماستان جەڭىلدەتىلگەن تارتىپپەن ازاماتتىق الا الادى. سونداي-اق، ەڭبەك ميگرانتتارىنا دا ءبىرقاتار جاڭا مۇمكىندىك قاراستىرىلىپ وتىر. سونىڭ ىشىندە ولارعا ءبىر جىلعا دەيىنگى كەز كەلگەن مەرزىمدە جۇمىس ىستەۋ قۇقىعى بەرىلەدى.

 جارقىنبەك امانتاي ۇلى، ق ر پارلامەنتى ءماجىلىسىنىڭ دەپۋتاتى:

- ەلدىڭ تاريحىن بىلەتىن ادام، ءتىلىن بىلەتىن، زاڭىن بىلەتىن ادام تەز بەيىمدەلەدى عوي. سوعان جول اشادى. ەكىنشى، ەڭبەك ميگراتسياسى. بۇرىن 3 اي، 6 اي، 9 اي دەگەن مەرزىمدەرمەن كەلەتىن. قازىر بۇل مەرزىمدى 12 ايعا دەيىن دەگەن مەرزىم قويدىق. شەتەلدىك ازاماتتىڭ كىناسىنەن ەمەس، باسقا سەبەپتەرمەن ەلدەن شىعا الماي قالعان جاعدايىندا ونىڭ ۋاقىتى، اسىرەسە، توتەنشە جاعدايلار كەزىندە اۆتوماتتى تۇردە ۇزارتىلادى.

زاڭ اياسىندا «قانداس» مارتەبەسىن بەرۋ ءتارتىبى وڭتايلاندىرىلادى. ەتنيكالىق قازاقتاردىڭ ۇلتىن راستاۋ ۇردىسىمەن ەندى جەرگىلىكتى اتقارۋشى ورگاندار اينالىسادى. بۇعان قوسا، ەڭبەك كۇشى تاپشى وڭىرلەرگە قونىس اۋدارۋشىلارعا ەشقانداي كونكۋرسسىز-اق جەر تەلىمى بەرىلەدى.

اسقاربەك ەرتايەۆ، ق ر ە ح ا ق م كوشى- ون كوميتەتىنىڭ ءتوراعاسى:

- پاسپورتىندا ۇلتى كورسەتىلمەگەن ەتنيكالىق قازاقتار تۇركيادان، اۋعانستاننان، پاكستاننان كەلىپ جاتىر. ۇلتتى انىقتاۋ ءۇشىن جەرگىلىكتى اتقارۋشى ورگاندار ارنايى كوميسسيالار قۇرىپ، سونداي جۇمىستار ۇيىمداستىرادى. سولتۇستىككە كوشەمىز دەسە، ولارعا جاڭا تۇزەتۋلەر قاراستىرىلعان جەر بەرۋ جاعىنان. بىرىنشىدەن، 5 جىلعا جالعا بەرىلەدى. ەگەر قونىس اۋدارۋشى 5 جىلدان كوپ تۇرسا سولتۇستىك وڭىرلەردە، بەرىلگەن جەر جەكەگە اۋدارۋعا بولادى. كوشى-قون ءۇردىسى كەزىندە پەدوفيلدەرگە، ەكسترەميستەر مەن لاڭكەستەرگە قازاقستانعا كىرۋگە قاتاڭ تىيىم سالىنىپ وتىر.

تاۋەلسىزدىك العالى بەرى ەلىمىزگە 1 ميلليون استام ەتنيكالىق قازاق ورالعان. بيىل بۇل باعىتقا تاعى 2,5 مىڭعا جۋىق كۆوتا ءبولىندى. جىلدىڭ العاشقى ايىنىڭ وزىندە 1300 دەن استام ادام اتامەكەنىنە ورالىپ، «قانداس» مارتەبەسىن الىپ ۇلگەردى.

www.24.kz