«قانداس» مارتەبەسىن الۋ جەڭىلدەيدى

استانا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى بىرنەشە جىلدان بەرى ماسەلە بولىپ كەلە جاتقان «قانداس» مارتەبەسىن بەرۋ ءتارتىبىن جەڭىلدەتپەك.

ەڭبەك جانە حالىقتى الەۋمەتتىك قورعاۋ مينيسترلىگى «قانداس» مارتەبەسىن بەرۋ ءتارتىبىن جەڭىلدەتپەك. بۇعان دەيىن تەك قازاقستان رەسپۋبليكاسىنىڭ شەت ەلدەردەگى مەكەمەسى جانە «قۇتتى مەكەن» ا ج موبيلدىك قوسىمشاسى ارقىلى ءوتىنىش بەرۋ مۇمكىن بولعان. ەندى «ازاماتتارعا ارنالعان ۇكىمەت» مەملەكەتتىك كورپوراتسياسى دا مۇنداي وتىنىشتەردى قابىلدايتىن بولدى.

بۇل تۋرالى مينيسترلىكتىڭ اشىق ن ق ا پورتالىندا جاريالاعان قۇجات جوباسىنان بەلگىلى بولدى، دەپ حابارلايدى turkystan.

قانداس مارتەبەسىن بەرۋ تۋرالى ءوتىنىشتى قازاقستان رەسپۋبليكاسىنىڭ شەت ەلدەردەگى مەكەمەسى ارقىلى، «قۇتتى مەكەن» ا ج موبيلدىك قوسىمشاسى نە مەملەكەتتىك كورپوراتسيا - «ازاماتتارعا ارنالعان ۇكىمەت» ارقىلى بەرەدى، - دەپ جازىلعان وزگەرتۋلەر جوباسىندا.

«قانداس» مارتەبەسىن الۋعا ءوتىنىش بەرۋشىلەردىڭ قۇقىق بۇزۋشىلىقتار جاساعانى نە جاساماعانى جانە ەكسترەميستىك، تەرروريستىك ۇيىمدارعا مۇشەلىگى تۋرالى اقپاراتتى تەكسەرۋ ۋاقىتى 20 دان 10 تاۋلىككە قىسقارادى. ال كوميسسيا ءوتىنىشتى 5 تاۋلىك ىشىندە (قازىرگى قولدانىستاعى ەرەجە بويىنشا - 10 تاۋلىك) قارايدى.

بۇل ىشكى ىستەر ورگاندارى مەن ۇلتتىق قاۋىپسىزدىك ورگاندارىنىڭ اۋماقتىق بولىمشەلەرىندە ازاماتقا «قانداس» ا ا ج ورناتۋ ارقىلى ەلەكتروندىق فورماتتا ۆەريفيكاتسيانى ەنگىزۋمەن جانە تيىسىنشە كوميسسيادا ەتنيكالىق قازاقتاردىڭ ۇسىنىلعان ماتەريالدارىن قاراۋ مەرزىمدەرىن قىسقارتۋمەن بايلانىستى، - دەپ جازىلعان مينيسترلىكتىڭ تۇسىندىرمە جازباسىندا.