قانات شارلاپايەۆ ۋتيلالىم مولشەرى تۋرالى: كورشىلەرىمىزدەن قالىپ قويدىق

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا رەسەيدە ۋتيلالىم مولشەرىنىڭ قىمباتتاۋى قازاقستانداعى نارىققا قالاي اسەر ەتەتىنىن ايتتى.

«مەن كورشى ەلدەردىڭ ۋتيلالىم ماسەلەسىندە قانداي ءتاسىل قولداناتىنىن نازار اۋدارىپ كورىڭىزدەرشى. ولار ۋتيلالىمدى الىپ تاستاۋدى قويىپ، قۇنىن كوتەرىپ جاتىر. قىرعىز رەسپۋبليكاسى Chevrolet Cobalt جانە Onix وندىرەتىن جەلىنى ىسكە قوسقان ەكەن. ەندى ولار دا ۋتيلالىم ەنگىزبەكشى. بۇل جەردە ءتۇسىنۋ كەرەك، قازاقستان ۋتيلالىم مەن العاشقى تىركەۋ مولشەرى بويىنشا ماڭايىمىزداعى كورشى ەلدەردەن قالىپ قويدىق»، - دەدى مينيستر.

رەسەيدەگى ۋتيلالىمنىڭ قىمباتتاۋى بىزدەگى باعاعا اسەر ەتپەيدى دەپ ويلايتىنىن ايتتى.

«باعانىڭ ايىرماشىلىعىنان بىزدە تاعى ەسكى كولىكتەر قاپتاۋى مۇمكىن. ونىڭ اسەرى ەكولوگياعا، جولداعى قاۋىپسىزدىككە تيەدى. شىنىمەن ونداي تاۋەكەل بار. رەسەيدەن بىزگە اۆتوقوقىس اعىلسا، قازاقستاندىقتارعا جولدا ءجۇرۋ قاۋىپتى بولا تۇسەدى»، - دەدى قانات شارلاپايەۆ.

اۆتور

ەسىمجان ناقتىباي