قامقور قازاقستاندىقتاردىڭ ارقاسىندا ءبىز ەل دامۋىنىڭ جۇيەلى ماسەلەلەرىن شەشە الامىز-ەرلان قارين

استانا. KAZINFORM - وتانداستارىمىزدىڭ بەلسەندى قاتىسۋى مەن قامقورلىعىنىڭ ارقاسىندا ءبىز توتەنشە جاعدايلارعا ءتيىمدى قارسى تۇرىپ قانا قويماي، ەل دامۋىنىڭ جۇيەلى ماسەلەلەرىن شەشە الامىز. بۇل تۋرالى ق ر مەملەكەتتىك كەڭەسشى ەرلان قارين مالىمدەدى.

«ورتالىقتاعى جانە جەرگىلىكتى جەردەگى مەملەكەتتىك ورگاندار قازىر سۋ تاسقىنىنىڭ زارداپتارىن جويۋعا، جاعدايدىڭ ۋشىعۋىنا جول بەرمەۋگە تولىقتاي جۇمىلدى. بارلىق ءتيىستى مەملەكەتتىك ورگاندار مەن قىزمەتتەر، اكىمدىكتەر تاۋلىك بويى جۇمىس ىستەپ جاتىر. قۇتقارۋ جۇمىستارىنا بارلىعى 9 مىڭنان استام ادام مەن 2 مىڭنان استام تەحنيكا جۇمىلدىرىلدى. سۋ تاسقىنى باستالعاننان بەرى زارداپ شەككەن 11-ايماقتا 19 مىڭنان استام ادام، ونىڭ ىشىندە 8 مىڭ بالا قۇتقارىلىپ، ەۆاكۋاتسيالاندى. مەملەكەت باسشىسى مەن ۇكىمەت دەڭگەيىندە جەدەل كەڭەستەر تۇراقتى تۇردە وتكىزىلىپ تۇرادى. پرەزيدەنت ەڭ جاقىن ەمەس، تابيعي اپات ەڭ كوپ تاراعان شالعاي وڭىرلەردىڭ بىرىنە ۇشىپ كەتتى. قاسىم- جومارت توقايەۆ وسىنداي قيىن- قىستاۋ ساتتەردە ءاردايىم وقيعا ورنىنا بارىپ، جاعدايدى جەكە باقىلاپ، ازاماتتارعا قولداۋ كورسەتىپ وتىرادى. بۇدان باسقا، قابىلدانىپ جاتقان شارالار مەن اعىمداعى جاعداي تۋرالى حالىقتى ۇزدىكسىز حاباردار ەتۋ ءۇشىن رەسپۋبليكالىق اقپاراتتىق شتاب قۇرىلدى. شتابتىڭ تاۋلىك بويى جۇمىسى ۇكىمەتتىڭ جەدەل شتابىنىڭ قىزمەتىمەن ۇيلەستىرىلەدى جانە ونى پرەزيدەنت اكىمشىلىگى ۇيلەستىرەدى» ، - دەپ جازدى ەرلان قارين Telegram-دا.

«وسىنىڭ بارلىعىندا ازاماتتارىمىزدىڭ ىنتىماعى مەن جاۋاپكەرشىلىگى ايقىن اڭعارىلادى. وتانداستارىمىزدىڭ وسىنداي بەلسەندى قاتىسۋى مەن قامقورلىعىنىڭ ارقاسىندا ءبىز توتەنشە جاعدايلارعا ءتيىمدى قارسى تۇرىپ قانا قويماي، ەل دامۋىنىڭ جۇيەلى ماسەلەلەرىن شەشە الامىز»، - دەدى ە. قارين.

ق ر مەملەكەتتىك حاتشىسى اتاپ وتكەندەي، ديالوگ الاڭدارىنىڭ ارقاسىندا سوڭعى جىلدارى مەملەكەت پەن قوعام كوپتەگەن وزەكتى ماسەلەلەردى شەشۋدىڭ وڭتايلى جولدارىن سىندارلى تۇردە ازىرلەپ جاتىر.

«مەملەكەت باسشىسىنىڭ باستاماسىمەن قولعا الىنعان ازاماتتار جانە مينيسترلەر مەن اكىمدەر اراسىنداعى كەزدەسۋلەردىڭ ديالوگتىق فورماتى ءتيىمدى قۇرالعا اينالدى. جاڭا ەرەجەلەر بويىنشا سايلانعان پارلامەنت پەن ءماسليحات دەپۋتاتتارى بەلسەندى جۇمىس ىستەۋدە، ولارعا قويىلاتىن تالاپ دەڭگەيى ايتارلىقتاي ارتتى. اتاپ ايتقاندا، سۋ تاسقىنىنىڭ العاشقى كۇندەرىنەن باستاپ پارلامەنت دەپۋتاتتارى مەن ۇلتتىق قۇرىلتايدىڭ دەپۋتاتتارى ازاماتتارمەن تۇراقتى بايلانىستا بولىپ، زارداپ شەككەن ايماقتاردى ارالاپ، سول جەرلەردە كەزدەسۋلەر وتكىزىپ، وبلىستىق شتابتاردىڭ جۇمىسىنا اتسالىستى. مۇنداي بىرلەسكەن ارەكەتتەر ناتيجە بەرەدى. بارلىق ديالوگ الاڭدارىنىڭ، سونداي- اق دەپۋتاتتار مەن قوعام بەلسەندىلەرىنىڭ الەۋەتى الداعى ۋاقىتتا ينفراقۇرىلىمدى قالپىنا كەلتىرۋگە جانە زارداپ شەككەندەرگە كومەك كورسەتۋگە جۇمسالاتىن قاراجاتتىڭ ءتيىمدى جۇمسالۋىن باقىلاۋعا تارتىلادى. بىرلىك پەن ىنتىماق قۇندىلىقتارى - مادەنيەتىمىز بەن ءدىلىمىزدىڭ وزەگى. وسى قۇندىلىقتاردى ۇستانۋ ارقىلى ءبىز كەز كەلگەن قيىندىقتى جەڭىپ، ەلدى جاڭعىرتۋ جولىندا بىرلەسە جۇمىس جاساي الامىز»، - دەپ تۇيىندەدى ءسوزىن ە. قارين.