قاماۋعا الىنعان ىستانبۇل مەرى يماموعلى سوت الدىندا جاۋاپ بەردى

استانا. KAZINFORM - ىستانبۇلدىڭ قاماۋعا الىنعان وپپوزيتسيالىق مەرى وزىنە قارسى قوزعالعان كوپ ءىستىڭ ءبىرى بويىنشا سوت الدىندا جاۋاپ بەردى، دەپ حابارلايدى Euronews.

ەكرەم يماموعلى 23-ناۋرىزدا سىبايلاس جەمقورلىق پەن تەرروريزمگە قاتىستى رەسمي ايىپ تاعىلعان سوڭ ىستانبۇلدىڭ باتىسىنداعى سيليۆري تۇرمەسىندە وتىر.

الايدا قازىرگى سوت ءىسى بولەك قارالىپ جاتىر جانە وندا يماموعلىنىڭ ىستانبۇل پروكۋرورى اكين گيۋرلەككە قوقان-لوققى جاسادى دەگەن بولجام ايتىلدى.

ايىپتاۋلار تۇركيانىڭ ەڭ ءىرى قالاسى اكىمىنىڭ گيۋرلەكتى باسقا وپپوزيتسيا وكىلدەرىنە قارسى قوزعالعان قىلمىستىق ىستەرى ءۇشىن سىناعان سوزدەرىنەن تۋىنداپ وتىر.

- مەن ىستانبۇلدا ءۇش رەت سايلاۋدا جەڭىسكە جەتكەندىكتەن وسى جەردە وتىرمىن. «كىم ىستانبۇلدا جەڭىسكە جەتسە، تۇركيادا دا جەڭىسكە جەتەدى» دەگەن پىكىردى جوققا شىعارعانىم ءۇشىن وسى جەردە وتىرمىن. سوڭعىسى ءوزىنىڭ ۇلكەن ساياسي مانسابىن ىستانبۇل مەرى رەتىندە باستاعان ەل پرەزيدەنتى رەجەپ تايىپ ەردوعانعا ناقتى يشارا بولدى، - دەدى يماموعلى.

تىڭداۋعا يماموعلىنىڭ ايەلى مەن ۇلى، سونداي- اق رەسپۋبليكالىق حالىق پارتياسى (CHP)، Halk TV جانە باسقا دا اقپارات قۇرالدارى قاتىستى.

ءىستى قايتا قاراۋ 16-ماۋسىمعا شەگەرىلدى.

يماموعلى العاشىندا 19-ناۋرىزدا ەكى تەرگەۋگە بايلانىستى ۇستالعان بولاتىن: ءبىرى ىستانبۇل مۋنيتسيپاليتەتىندەگى سىبايلاس جەمقورلىققا قاتىستى، ەكىنشىسى كۇردتەردى قولدايتىن ساياساتكەرلەرمەن ءوز پارتياسىنىڭ سايلاۋ كەلىسىمىندەگى تەرروريزمگە قاتىسى بار.

ونىڭ بوساتىلۋىن تالاپ ەتكەن شەرۋلەر 2000 عا جۋىق ادامنىڭ قاماۋعا الىنۋىنا اكەلدى.

قاماۋدا بولعان كەزدە اكىم رەسمي تۇردە جەو پرەزيدەنتتىگىنە كانديدات رەتىندە ۇسىنىلدى.

سايلاۋ 2028-جىلى وتەدى، ءبىراق ەرتەرەك ءوتۋى مۇمكىن جانە يماموعلىنىڭ تۇرمەگە قامالۋىنىڭ ساياسي استارى بار دەلىنگەن. الايدا تۇرىك ۇكىمەتى سوت جۇيەسى تاۋەلسىز جانە ساياسي ىقپالدان ازات ەكەنىن العا تارتادى.

سونداي-اق جۇما كۇنى ىستانبۇلدىڭ تاعى ەكى سوتىندا يماموعلىعا قاتىستى ءىس بويىنشا تىڭداۋ ءوتتى. سونىڭ ءبىرى - 10 جىل بۇرىن ىستانبۇلدىڭ بەيليكدۋزۋ اۋدانىنىڭ مەرى بولعان كەزدەگى تەندەردى بۇرمالاۋ ءىسى.

تاعى بىرىندە زاڭسىز اقشا جيناۋ تۋرالى ايىپتار بار. بۇل وتكەن جىلعى جەرگىلىكتى سايلاۋ قارساڭىندا تاراتىلعان ۆيدەودا جەو وفيتسەرلەرىنىڭ قولما- قول اقشانى ساناپ جاتقانى كورسەتىلگەن.

بۇعان دەيىن ەكرەم يماموعلى ىستانبۇل مەرى قىزمەتىنەن بوساتىلعانى حابارلانعان بولاتىن.