قاليبەك قۋانىشبايەۆ اتىنداعى دراما تەاترىندا جاڭا ماۋسىم اشىلدى

استانا. KAZINFORM - ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ جاڭا ماۋسىمى «اباي» سپەكتاكلىمەن اشىلدى.

11-قىركۇيەكتە قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىنىڭ 34- ماۋسىمى باستالدى. جاڭا ماۋسىم شىمىلدىعى ءداستۇرلى تۇردە م. اۋەزوۆتىڭ «اباي» قويىلىمىمەن اشىلدى.

ابايدىڭ عاسىرلار بويى قالىپتاسقان كەرتارتپا ادەت-عۇرىپتار مەن ادىلەتسىزدىككە قارسى كۇرەسى، ونىڭ تەرەڭ ويلارى مەن فيلوسوفياسى ساحنادا ايقىن كورىنىس تاپتى. اكتەرلەردىڭ شەبەر ويىنى كورەرمەندەردى ەرەكشە اسەرگە بولەدى.

اعا اباي ءرولىن سومداعان تىلەكتەس مايراموۆ پەن جاس ابايدى بەينەلەگەن نۇركەن وتەۋىلدىڭ شەبەرلىگى كوپشىلىكتىڭ ەرەكشە ىقىلاسىنا يە بولدى. قويىلىم اياقتالعاننان كەيىن دە اكتەرلەرگە ۇزاق ۋاقىت قوشەمەت كورسەتىپ، ولاردىڭ ەڭبەگىن جوعارى باعالادى.

قويىلىمنىڭ رەجيسسەرى - قازاقستاننىڭ ەڭبەك سىڭىرگەن قايراتكەرى ءا. ورازبەكوۆ، حورمەيستەرى - قازاقستاننىڭ ەڭبەك سىڭىرگەن قايراتكەرى ا. جۇماشەۆ، قويۋشى سۋرەتشى - ق. ماقسۇتوۆ.

ايتا كەتەيىك، قىركۇيەك ايىنىڭ رەپەرتۋارىندا تەاتر م. اۋەزوۆتىڭ «اباي»، «قاراگوز»، «ايمان- شولپان»، گ. نيزاميدىڭ «ءلايلى-ءماجنۇن»، د. رامازاننىڭ «جوشى حان»، س. تۇرعىنبەك ۇلىنىڭ «ءشامشى» جانە تاعى باسقا سپەكتاكلدەردى ۇسىنادى.

سونىمەن قاتار، حالىق اسپاپتار انسامبلى مەن سيمفونيالىق وركەستردىڭ كونسەرتتەرى دە كورەرمەن نازارىنا ۇسىنىلادى.

سونىمەن قاتار، «قاراگوز» تراگەدياسى اقتاۋدا وتەتىن III حالىقارالىق «ءابىش الەمى» تەاتر فەستيۆالىنە، «ۆويتسەك» دراماسى پاۆلوداردا وتەتىن «ەرتىس-بايان» I رەسپۋبليكالىق تەاترلار فەستيۆالىنە قاتىسادى.

جاڭا ماۋسىمنىڭ باستى جاڭالىقتارىنىڭ ءبىرى - قازان ايىندا «فيگارونىڭ ۇيلەنۋى» سپەكتاكلىنىڭ پرەمەراسى وتسە، جەلتوقسان ايىندا «پاراسات مايدانى» قويىلىمى كوپشىلىككە ۇسىنىلادى.

فوتو: قۋانىشبايەۆ تەاترى

اۆتور
دانا نۇرباقىت