قالقانشا بەزى قاتەرلى ىسىگىنە ايەلدەر ءجيى شالدىعادى - ونكولوگ

الماتى. KAZINFORM - زەرتتەۋلەر كورسەتكەندەي، ايەلدەر ەر ادامدارعا قاراعاندا قالقانشا بەزى قاتەرلى ىسىگىنە ءجيى شالدىعادى. بۇل تۋرالى الماتى ونكولوگيالىق ورتالىعىنىڭ ونكولوگ دارىگەرى گۇلبانۋ ناقىسبەك ايتتى.

دارىگەردىڭ ايتۋىنشا، قالقانشا بەزى قاتەرلى ىسىگى - ەندوكريندىك قاتەرلى ىسىكتىڭ ەڭ كوپ تاراعان ءتۇرىنىڭ ءبىرى.

«ەرلەرگە قاراعاندا ايەلدەردىڭ قالقانشا بەزى قاتەرلى ىسىگىنە شالدىعۋ قاۋپى جوعارى. بۇل گورمونالدى وزگەرىستەرمەن تۇسىندىرىلەدى. ەستروگەن مەن پروگەستەرون سياقتى ايەل جىنىستىق گورموندارىنىڭ دەڭگەيى قالقانشا بەزىنىڭ ءوسۋى مەن جۇمىسىنا اسەر ەتۋى مۇمكىن»، - گۇلبانۋ ناقىسبەك.

سونىمەن قاتار، ول جۇكتىلىك، كونتراتسەپتيۆتەر جانە گورموندىق تەراپيا سياقتى گورمونالدى پرەپاراتتاردى قولدانۋ قالقانشا بەزى قاتەرلى ىسىگىنىڭ دامۋ قاۋپىن ارتتىرۋى مۇمكىن ەكەنىن جەتكىزدى.

قالقانشا بەزىندە ءتۇيىن نە ىسىكتىڭ پايدا بولۋى، مويىننىڭ ءىسىنۋى، جۇتىنۋدىڭ قيىنداۋى، داۋىستىڭ وزگەرۋى نەمەسە قارلىعۋ، مويىن ايماعىنداعى اۋىرسىنۋ نەمەسە جايسىزدىق، تابەت پەن سالماقتىڭ ءجيى نە ادەتتەن تىس وزگەرۋى قالقانشا بەزى قاتەرلى ىسىگىنىڭ نەگىزگى بەلگىلەرى.

«كەيبىر بەلگىلەر اۋرۋدىڭ باستاپقى كەزەڭىندە بايقالمايتىنىن ەسكەرۋ ماڭىزدى. سوندىقتان كەز كەلگەن كۇدىكتى بەلگى پايدا بولعاندا جۇيەلى تەكسەرۋدەن ءوتىپ، دارىگەرگە كورىنگەن دۇرىس. ەسىڭىزدە بولسىن، اۋرۋدى ەرتە انىقتاۋ جانە ادەكۆاتتى ەمدەۋ ساۋىعىپ كەتۋ جانە ناۋقاستىڭ بولجامىن جاقسارتۋ مۇمكىندىگىن ايتارلىقتاي ارتتىرۋى مۇمكىن»، - دەپ تۇيىندەدى دارىگەر.

اۆتور

الما مۇقانوۆا