قالجىر وزەنىن لاستاپ جاتىر: ش ق و- دا التىن قازۋشىلارعا قاتىستى تەكسەرىس باستالدى

وسكەمەن. KAZINFORM - شىعىس قازاقستان وبلىسى مارقاكول اۋدانىنداعى التىن قازۋشىلارعا قاتىستى تەكسەرۋ جۇرگىزۋ ءۇشىن ارنايى كوميسسيا قۇرىلدى.

سوڭعى كۇندەرى الەۋمەتتىك جەلىدە مارقاكول اۋدانىندا تۇسىرىلگەن ۆيدەو تارادى. وندا التىن قازۋشىلاردىڭ قالجىر وزەنىن لاستاپ جاتقانى ايتىلعان.

ونەركاسىپ جانە قۇرىلىس مينيسترلىگىنىڭ مالىمەتىنشە، وسى ماسەلەگە قاتىستى تەكسەرۋ جۇرگىزىلەدى.

- مارقاكول اۋدانىندا جەر قويناۋىن پايدالانۋعا ليتسەنزياسى مەن كەلىسىمشارتى بار 6 كومپانيا جۇمىس ىستەپ جاتىر. سونىمەن قاتار التىن وندىرۋگە ليتسەنزيا العان 10 جەكە قازۋشى بار. قازىر ەكولوگيا، ونەركاسىپ مينيسترلىكتەرى، وبلىس اكىمدىگى، باس پروكۋراتۋرا جانە باسقا دا مۇددەلى مەملەكەتتىك ورگاندار قىزمەتكەرلەرىنەن ارنايى كوميسسيا قۇرىلدى. 1-تامىزدا اتالعان اۋماققا جوسپاردان تىس تەكسەرۋ باستالدى. تابيعاتتى لاستاۋ نەمەسە زاڭسىز ءوندىرۋ دەرەكتەرى انىقتالعان جاعدايدا، كىنالىلەر زاڭعا سايكەس جاۋاپقا تارتىلادى، - دەلىنگەن اقپاراتتا.

ەسكە سالساق، وسىعان دەيىن قازاقستانعا ەكولوگيالىق قاۋىپتى شينالار زاڭسىز تاسىمالدانعانى حابارلانعان.

اۆتور

تالعاتجان مۇحامەتبەك ۇلى