حاتتى قازاقتىڭ ايگىلى جازۋشىسى، دراماتۋرگ، قوعام قايراتكەرى عابيت مۇسىرەپوۆ حالقىمىزدىڭ تاعى ءبىر اردا ۇلى، جازۋشى، عالىم اقسەلەۋ سەيدىمبەككە جازعان ەكەن.
عابيت مۇسىرەپوۆ حاتتى 1985-جىلى سول كەزدە «سوتسياليستىك قازاقستان» گازەتىندە قىزمەت ەتىپ جۇرگەن جۋرناليست ىنىسىنە جازعان. حاتتا جازۋشىنىڭ سپورتقا دەگەن قىزىعۋشىلىعىن، گازەتتە سپورت تاقىرىبىندا جاريالانعان ماقالالاردى قىزىعا وقىپ جۇرگەنىن كورۋگە بولادى.
وندا بىلاي دەگەن: «اقسەلەۋ! تەلەفونمەن قولعا تۇسە قويمادىڭ. 15 ءىى-83 كۇنگى سوتس. ق. دا باسىلعان گۇلنار ساحاتوۆا دەگەن شاحماتشى قىزىمىز جايىنداعى وچەركتەرىڭىز ماعان قاتتى ۇنادى. گۇلناردىڭ فوتوسىن بۇرىن ءبىر كەسىپ الىپ، شىنىعا قىستىرىپ قويعان روزا يمانبايەۆا دەگەن كونكيشى قىزىم بولۋشى ەدى، سونىڭ قاسىنا قىستىرىپ قويدىم.
مۇمكىن بولسا سول روزا جايىندا ءبىر وچەرك جاريالاماسسىزدار ما ەكەن؟
سالەممەن (عابيت مۇسىرەپوۆتىڭ قولى قويىلعان)
15. ءى.83»
ويدى وي قوزعايدى دەمەكشى، قازىر وسى ءبىر جاپىراق قاعازدى قولىما ۇستاپ، اكەم جۇمابەك ومار ۇلى ونى ۇيدە نەگە ساقتاعانىن ويلاپ وتىرمىن. اكەم سول جىلى «سوتسياليستىك قازاقستاندا» جۇمىس ىستەگەن. 1981-جىلى س. م. كيروۆ اتىنداعى قازاق مەملەكەتتىك ۋنيۆەرسيتەتىن ۇزدىك وقىپ بىتىرگەن سوڭ، 1986-جىلعا دەيىن «سوتسياليستىك قازاقستان» («egemen Qazaqstan» ) گازەتىندە ءتىلشى، ودان كەيىن ءبولىم مەڭگەرۋشىسى بولعان.
اكەم قانداي دا ءبىر ىسكە مىعىم بولسا، قۇجاتقا دا وتە تياناقتى بولاتىن. وسى حاتتى اقسەلەۋ سەيدىمبەك وزىنە كورسەتكەن بولۋى كەرەك. ءسويتىپ، اكەم ونى ءبىر پاپكانىڭ اراسىندا ۇستاپ، وزدەرىنىڭ جۇمىسىنا بەرىلگەن باعانى ساقتاعىسى كەلگەنى شىعار دەپ ويلايمىن.
داستان كەنجالين
egemen.kz