جوشىنىڭ اينالاسىنداعى تارتىس عىلىمعا پايدالى - ءماجىلىس دەپۋتاتى
استانا. KAZINFORM - ءماجىلىس دەپۋتاتى، تاريح عىلىمدارىنىڭ دوكتورى ەركىن ءابىل استانادا ءوتىپ جاتقان «جوشى، شاعاتاي، حايدۋ ۇلىستارى مەن موعولستاننىڭ ەتنوساياسي تاريحى» اتتى حالىقارالىق كونفەرەنسيا كەزىندە جوشى ۇلىسىنىڭ تاريحىنا قاتىستى حالىقارالىق پىكىرتالاستار تۋرالى پىكىر ءبىلدىردى.
«ەۋرازيا عالىمدارىنىڭ اراسىندا جوشى ۇلىسىنىڭ تاريحى بويىنشا اۋىزبىرلىك بار ما؟ رەسەي عالىمدارى وزىنە، قازاق عالىمدارى وزىنە، مونعول عالىمدارى وزىنە تارتاتىن سياقتى. شىندىق كىمنىڭ جاعىندا؟» - دەپ سۇرادى جۋرناليست كونفەرەنسيا كۋلۋارىندا.
دەپۋتاتتىڭ ايتۋىنشا، ونداي پىكىرتالاستىڭ توقتاماعانى ماڭىزدى.
«ارينە، پىكىرتالاس كوپ. كەيبىر ماسەلە بويىنشا ىمىرا تابۋ قيىن. ءبىراق عىلىمدا ەشقاشان ءبىرتۇتاس پايىم دەگەن بولمايدى. ونداي كەڭەس زامانىندا عانا بولعان. ءبارى ءبىر تۇجىرىمداماعا يلانۋى كەرەك بولاتىن. ءسىز ايتقان پىكىرتالاستىڭ بولعانى دا جاقسى. ويتكەنى عىلىم ديسكۋسسيا ارقىلى داميدى. پىكىرتالاستار ارقىلى ءبىر پايىمعا كەلۋگە بولادى»، - دەيدى ول.
ەركىن ءابىل جوشى ۇلىسىن ۇلىقتاۋ قازاق رۋحانياتىنا نە بەرەتىنىن دە ايتتى.
«قازاق حالقىنىڭ قالىپتاسۋ كەزەڭى جوشى ۇلىسىنىڭ داۋىرىندە بولدى. ون ءۇشىنشى عاسىردان باستاپ ون بەسىنشى عاسىرعا دەيىن قازاق ءتىلىنىڭ، رۋحاني- ماتەريالدىق مادەنيەتىنىڭ نەگىزى، ۇلتتىق ساناسى قالىپتاستى. بىزگە جەتكەن باتىرلار جىرى، شەجىرەلەر، تاريحي داستاندار، قازاقتىڭ «قازاق» دەپ اتالۋى وسى جوشى ۇلىسىنىڭ قۇرامىندا جۇرگەندە بولدى. جوشى ۇلىسىنىڭ سوڭعى وكىلى كەنەسارى حان دەۋگە بولادى. سوندىقتان قازاق تاريحىنىڭ ۇزىلمەگەنىن، مەملەكەتتىلىگى وزەگىنەن ايىرىلماعانىن جوشى ۇلىسىنىڭ تاريحىنان كورۋگە بولادى»، - دەدى دەپۋتات.
اۆتور
ەسىمجان ناقتىباي