قالا سىرتىنداعى جولداردا جول اپاتىنىڭ سانى ازايدى

استانا. KAZINFORM - قازاقستاننىڭ قالا سىرتىنداعى تراسسالارىندا اپاتتىلىقتىڭ تومەندەۋى بايقالادى. 2025 -جىلدىڭ باسىنان بەرى بۇل جولداردا جول- كولىك وقيعالارىنىڭ سانى %8 ازايدى. سونىمەن بىرگە جول اپاتتارىندا زارداپ شەككەندەردىڭ دە سانى تومەندەدى، - دەپ جازدى Polisia.kz.

بۇعان ىشكى ىستەر مينيسترلىگىنىڭ جول قوزعالىسى قاۋىپسىزدىگىن قامتاماسىز ەتۋ بويىنشا قابىلداعان شارالارى ىقپال ەتتى. نەگىزگى شارالاردىڭ ءبىرى جولداردىڭ قاۋىپتى ۋچاسكەلەرىندە ءجۇرىس بولىگىن ۋاقىتشا تارىلتۋ ءتاسىلى بولدى.

جولدىڭ مۇنداي بولىكتەرىندە اۆتوكولىك جۇرگىزۋشىلەرى ينستينكتيۆتى تۇردە جىلدامدىقتى ازايتادى. اتالعان ءادىس ءبىرقاتار شەت ەلدە ءوزىنىڭ تيىمدىلىگىن كورسەتىپ، بۇگىندە قازاقستاندا ءساتتى قولدانىلىپ جاتىر.

جولدى تارىلتۋ ءتاسىلى استانا - قاراعاندى، استانا - پاۆلودار، الماتى - بىشكەك، سامارا - شىمكەنت، اقتوبە - استراحان سياقتى جانە باسقا باعىتتاردى قوسا العاندا رەسپۋبليكالىق تراسسالاردىڭ 26 ۋچاسكەسىندە جۇزەگە اسىرىلىپ كەلەدى. وندا پاترۋلدىك ەكيپاجدار جۇمىس ىستەيدى. پوليتسەيلەر جۇرگىزۋشىلەردى جىلدامدىق رەجيمىن ساقتاۋعا، جولدا مۇقيات بولۋعا شاقىرادى. ماقسات - جازالاۋ ەمەس، جول اپاتتارىنىڭ الدىن الۋ.

ەلىمىزدىڭ جەتى وڭىرىندە ۇشۋ قۇرىلعىلارىنىڭ كومەگىمەن اۋەدەن پاترۋلدەۋ جۇرگىزىلەدى. سونىڭ ناتيجەسىندە ءۇش مىڭنان استام قۇقىقبۇزۋشىلىقتىڭ جولى كەسىلدى. اۆتوجولداردا بۇزۋشىلىقتاردى تىركەۋدىڭ 500 گە جۋىق كەشەنى جۇمىس ىستەيدى، ونىڭ ىشىندە 100 ى جاسىرىن رەجيمدە.

قوزعالىس قارقىندى ۋچاسكەلەردە ورتاشا جىلدامدىقتى باقىلاۋ ەنگىزىلدى. قازىر 1900 شاقىرىم قامتىلسا، جاقىن ارادا تاعى مىڭ شاقىرىم قوسىلادى.

جول ءجۇرىسى قاعيدالارىن قاساقانا بۇزۋشىلارمەن بەلسەندى كۇرەس جۇرگىزىلىپ جاتىر. ول ءۇشىن «قورعاۋ» ارنايى اقپاراتتىق جۇيەسى قولدانىلادى. سونىمەن قاتار قالا ىشىندە جانە تراسسالاردا تاۋلىك بويى جول قوزعالىسى ەرەجەلەرىن بۇزۋدى تىركەيتىن اۆتوماتتى كامەرالار جەلىسى بەلسەندى دامىپ كەلەدى.

بۇعان دەيىن جول اپاتىنا كىنالى ادام وقيعا ورنىنان قاشىپ كەتسە نە ىستەۋ كەرەك ەكەنىن جازعان بولاتىنبىز.

اۆتور

ەلميرا ورالبايەۆا