قاجىمۇقاننىڭ بەينەسىن سومداعان اكتەردىڭ بويى - 2 مەتر 10 سانتيمەتر
استانا. قازاقپارات -«قاجىمۇقان» فيلمىندە باستى ءرولدى ويناعان اكتەر ەربول تولەپبەرگەن دە - الىپ كۇش يەسى. ونىڭ بويى - 2 مەتر 10 سانتيمەتر، سالماعى - 118 كەلى.
«قاجىمۇقان» فيلمىندە باستى ءرولدى ويناۋ ءۇشىن ماماندار ازىرلەگەن ارنايى راتسيونمەن تاماقتانۋعا تۋرا كەلدى. 1,5 جىل تاۋىق ەتىنەن باسقا ەتتەن باس تارتتىم»- دەيدى پالۋاننىڭ بەينەسىن كورەرمەنگە جەتكىزگەن اكتەر.
ءوزى ونەر اكادەمياسىندا اكتەرلىك شەبەرلىكتەن ساباق بەرەدى. كينوكارتينا مادەنيەت جانە اقپارات مينيسترلىگىنىڭ قولداۋىمەن ءتۇسىرىلدى. ءبىر قىزىعى، كينودا پالۋان قاجىمۇقاننىڭ جاس كەزىن ەربولدىڭ تۋعان ءىنىسى دياس تولەپبەرگەن وينايدى. اعايىندى اكتەرلار ءبىر رولگە كەزدەيسوق تاڭدالىپتى.
ءبىتىمى بولەك ەربول تولەپبەرگەن كاستينگكە كەلگەندە فيلمگە تاڭدالعان اكتەرلاردىڭ ىشىنەن ءوزىنىڭ ءىنىسى دياستىڭ دا فوتوسىن كورىپ قالادى. رەجيسسەر ەكى اكتەردىڭ تەگىنە ەمەس، بولمىس-بىتىمىنە ءمان بەرگەن ەكەن. وسىلايشا، اعايىندى الىپتار قاجىمۇقان پالۋاننىڭ جاس كەزى مەن ەگدە تارتقان شاعىن ويناپ شىعادى. «بىلەك كۇشى سىنعا تۇسكەن ساحنانى ءتۇسىرۋ وڭاي بولمادى»، - دەيدى اكتەر.
ەربول تولەپبەرگەن، اكتەر:
- ساراكيكيدى ءوزىمىزدىڭ ارىپتەسىمىز ءاشىم احمەتوۆ وينادى. ول دا - الپاۋىت جىگىت. ءبىر- ءبىرىمىزدى كوتەرىپ، ءتۇسىرىپ، قايتا-قايتا دۋبلدان-دۋبل جاساۋ وتە قيىن. ءبىز ول ساحنانى كەم دەگەندە 4 كۇن تۇسىردىك. شارشاپ قالىپ جاتىرمىز، كۇش جەتپەي جاتىر، ءبىراق 4 كۇندە بار كۇشىمىزدى سالىپ، ايتەۋىر ءبىتىرىپ شىقتىق. ەڭ ۇزاق ساحنالاردىڭ ءبىرى بولدى.
«قاجىمۇقان» فيلمىنىڭ پروكاتقا شىققانىنا ءبىر اپتاعا جۋىقتادى. كينوزالدان پالۋان باباسىنىڭ رۋحىن سەزىنىپ شىعىپ جاتقان جەتكىنشەكتەر وتە كوپ. ولار ەندى سۋپەرمەنگە ەمەس، قاجىمۇقانعا ەلىكتەيدى. «بۇل ءبىزدىڭ ءاۋ باستاعى ماقساتىمىز ەدى»، - دەيدى فيلمنىڭ رەجيسسەرى قاناعات مۇستافين.
ۇلكەن-كىشى كورەرمەن اكتەرلاردىڭ شەبەر ويىنىنا ءتانتى. باس كەيىپكەردىڭ وبرازىن اشا الاتىن اكتەردى تابۋ وڭايعا سوقپاپتى.
قاناعات مۇستافين، فيلمنىڭ رەجيسسەرى:
- ەڭ قيىنى كاستينگ بولدى. ويتكەنى مەن جاڭاعى كاستينگ ديرەكتورى مايرا ابديبايەۆاعا بويى مەتر 95-تەن ۇزىن اكتەر بولۋ كەرەك دەپ تالاپ قويعانمىن. ويتكەنى قاجەكەڭنىڭ بويى 1,94 بولعان. سپورتشىلاردىڭ دا اراسىنان دا ىزدەي باستادىق. ءسويتىپ، 2 مىڭداي جىگىتتى قارادىق، 6 اي بويى. ءسويتىپ، وسى جۇرگەنوۆتىڭ ستۋدەنتى دياس جانە ەربول تولەپبەرگەن ەكەۋى كاستينگتەن ءوتتى.
فيلم 1,5 جىل تۇسىرىلگەن. وسى ۋاقىت بويى دەنە ءبىتىمىن ساقتاۋ ءۇشىن ەربول ماماندار ازىرلەگەن ارنايى راتسيون بويىنشا تاماقتانعان. ءتىپتى ەت جەۋگە شەكتەۋ قويىلىپتى. بۇلشىق ەتىن ءوسىرۋ ءۇشىن بوديبيلدينگپەن اينالىسىپ، جاتتىعۋ زالىندا كوپ تەر توككەن. 2,5 اي كاسكادەرلىك تاسىلدەردى ۇيرەنىپ، فيلمدە دۋبلەرسىز بارلىق قيمىلداردى ءوزى جاساپ شىقتى.
ەربول تولەپبەرگەن، اكتەر:
- مۇنداي تيتاندى سومداپ شىعۋ مەن ءۇشىن ەڭ باسىندا قورقىنىش بولدى. كەيىن ول قورقىنىشتى جەڭىپ، ويناپ شىققاننان كەيىن ەرلىك بولدى. مۇنداي تۇلعانى سومداپ شىعۋ، جاڭاعى ايتىپ وتىرمىن عوي، مەن ءۇشىن ەرلىك بولدى.
كارتينا ۇلتتىق كينونى قولداۋ مەملەكەتتىك ورتالىعىنىڭ قارجىسىنا ءتۇسىرىلدى. ءالى تالاي ۋاقىت پروكاتتا بولادى. فيلمنىڭ جابىق كورسەتىلىمىنە ارنايى شاقىرىلعان پالۋاننىڭ ۇرپاعى باقىتجان قاجىمۇقانوۆ: «اتامدى كورگەندەي بولدىم»، - دەپ ريزاشىلىعىن ءبىلدىرىپتى.
«كورەرمەننىڭ العىسى بارىنەن قىمبات»، - دەيدى اكتەر.
24.kz